राजबिराज (सप्तरी), १३ पुस । सप्तरी प्रहरीले ठूलो परिमाणमा लागू औषध खैरो हिरोइन (ब्राउनसुगर) जस्तो देखिने पदार्थ सहित तीन जनालाई पक्राउ गरेको छ । लागू औषध कारोबारविरुद्ध सञ्चालन भइरहेको अभियान अन्तर्गत विशेष सूचनाको आधारमा गरिएको कारबाहीको क्रममा उक्त लागुऔषध जस्तो देखिने पदार्थ सहित तीन जनालाई नियन्त्रणमा लिइएको हो ।
पक्राउ पर्नेमा मोरङ जिल्लाको विराटनगर महानगरपालिका वडा नम्बर १७ निवासी अन्दाजी ३७ वर्षीय रजप आलम, विराटनगर महानगरपालिका वडा नम्बर ०४ निवासी अन्दाजी ३२ वर्षीय अनुरुध निरौला तथा सोही स्थानका अन्दाजी २१ वर्षीय निकेश कुमार शर्मा रहेका छन् ।
जिल्ला प्रहरी कार्यालय सप्तरीका अनुसार गत शुक्रबार अपराह्न करिब ४ः३० बजेको समयमा प्रहरी नायब निरीक्षकको कमाण्डमा खटिएको प्रहरी टोलीले सप्तरी जिल्लाको तिलाठीकोइलाडी गाउँपालिका वडा नम्बर ०८ अन्तर्गत तोपा बजार क्षेत्रमा चेकजाँचका क्रममा उनीहरूलाई पक्राउ गरेको हो ।
भारदहबाट राजविराजतर्फ जाँदै गरेको प्र.१–०४–००१ ज ००४५ नम्बरको कार शंकास्पद देखिएपछि रोकि जाँच गर्दा कारभित्र सवार व्यक्तिहरूको शरीर तलासी लिइएको थियो । तलासीका क्रममा अनुरुध निरौलाले लगाएको हुडीभित्र लुकाइछिपाइ राखिएको अवस्थामा सेतो प्लास्टिकका दुई वटा पोका बरामद गरिएको प्रहरीले जनाएको छ ।
बरामद गरिएका पोकाभित्र लागू औषध खैरो हिरोइन (ब्राउनसुगर) जस्तो देखिने लिसाइलो पदार्थ २०५ ग्राम ८२ मिलिग्राम रहेको पुष्टि भएको प्रहरीले जनाएको छ । बरामद लागू औषध, प्रयोग गरिएको कार तथा संलग्न तीनै जनालाई नियन्त्रणमा लिई कानून बमोजिम कारवाही प्रक्रिया अगाडि बढाइएको हो ।
पक्राउ परेका व्यक्तिहरूलाई सम्मानित सप्तरी जिल्ला अदालत, राजविराजबाट पाँच दिनको म्याद थप गरी जिल्ला प्रहरी कार्यालयको हिरासतमा राखी आवश्यक अनुसन्धान कार्य अगाडि बढाइएको जिल्ला प्रहरी कार्यालय सप्तरीका प्रहरी नायब उपरीक्षक (डीएसपी) डम्बर बहादुर पुरीले जानकारी दिए ।
प्रहरीले लागू औषध कारोबार नियन्त्रणका लागि यस्ता अभियानलाई अझ कडाइका साथ निरन्तरता दिइने जनाएको छ । 
प्रतिक्रिया दिनुहोस् !