वीरगंज (पर्सा), ४ पुस । निजी तथा आवासीय विद्यालय अर्गनाइजेसन नेपाल (प्याब्सन) वीरगंजको आयोजनामा सञ्चालन भइरहेको दोश्रो संस्करणको प्याब्सन छात्रा तथा जुनियर छात्र नकआउट क्रिकेट प्रतियोगिता अन्तर्गत पाँच वटा रोमाञ्चक खेलहरू सम्पन्न भएका छन् । विद्यालयस्तरमै खेलकुद संस्कृतिको विकास गर्ने उद्देश्यसहित आयोजना गरिएको प्रतियोगिताले विद्यार्थीहरूमा उत्साह र प्रतिस्पर्धात्मक भावना थपेको छ ।
प्याब्सन वीरगंजका सचिव अमित आलोकका अनुसार विद्यार्थीहरूमा खेलकुद भावना अभिवृद्धि गर्नुका साथै शारीरिक र मानसिक विकासलाई प्रोत्साहन गर्ने मुख्य उद्देश्यले प्रतियोगिता आयोजना गरिएको हो । उनले यस्ता खेलकुद कार्यक्रमले अनुशासन, टिमवर्क र नेतृत्व क्षमता विकासमा समेत महत्वपूर्ण भूमिका खेल्ने बताए । छात्रातर्फ सम्पन्न पहिलो खेलमा माउन्ट एडमन्ड स्कुलले जीवन ज्योति स्कुललाई ९ विकेटले पराजित गर्दै विजयी सुरुवात गरेको छ । उक्त खेलमा उत्कृष्ट प्रदर्शन गरेकी माउन्ट एडमन्डकी स्मृति कुमारी भुलम ‘प्लेयर अफ दि म्याच’ घोषित भइन् ।
त्यसैगरी, जुनियर छात्रतर्फको दोश्रो खेलमा अल्पाइन स्कुलले माउन्ट मकालु स्कुललाई २९ रनको अन्तरले पराजित गर्दै प्रतियोगितामा आफ्नो दबदबा कायम राख्यो । यस खेलमा अल्पाइन स्कुलका अजद आलम उत्कृष्ट प्रदर्शनका कारण ‘प्लेयर अफ दि म्याच’ बने । छात्रातर्फको तेश्रो खेलमा गौतम स्कुलले गुरुकुल स्कुललाई ६० रनको फराकिलो अन्तरले पराजित गरेको छ । गौतम स्कुलकी श्रेष्का बस्नेतले प्रभावशाली खेल प्रदर्शन गर्दै ‘प्लेयर अफ दि म्याच’को उपाधि हात पारिन् ।
चौथो खेलमा छात्रातर्फ नै अल्पाइन स्कुल र एसआर ग्यालेक्सी स्कुलबीच कडा प्रतिस्पर्धा भएको थियो । रोमाञ्चक खेलमा एसआर ग्यालेक्सी स्कुलले ५ विकेटको जित दर्ता गर्न सफल भयो । यस खेलमा रागनी कुशवाहा उत्कृष्ट खेलाडी घोषित भइन् । पाँचौँ खेल जुनियर छात्रतर्फ गौतम स्कुल र गोल्डेन फ्युचर स्कुलबीच सम्पन्न भएको थियो । उक्त खेलमा गोल्डेन फ्युचर स्कुलले ७ विकेटको सहज जित हात पार्यो । उत्कृष्ट प्रदर्शन गरेका गोल्डेन फ्युचरका रेहान अन्सारी ‘प्लेयर अफ दि म्याच’ घोषित भए ।
आयोजकका अनुसार यस प्रतियोगिताले विद्यालयस्तरमै क्रिकेटप्रतिको रुचि बढाउनुका साथै विद्यार्थीहरूबीच अनुशासन, सहकार्य, आत्मविश्वास र स्वस्थ प्रतिस्पर्धात्मक भावना विकास गर्ने अपेक्षा गरिएको छ । प्रतियोगिताका बाँकी खेलहरू आगामी दिनहरूमा निरन्तर सञ्चालन हुने प्याब्सन वीरगञ्जले जनाएको छ । 
प्रतिक्रिया दिनुहोस् !