वीरगंज (पर्सा), ३ पुस । निजी तथा आवासीय विद्यालय सङ्गठन (प्याब्सन) वीरगंजको आयोजनामा सञ्चालन भइरहेको दोश्रो संस्करणको ‘प्याब्सन गर्ल्स एन्ड जुनियर बोयज टी–१० नकआउट क्रिकेट प्रतियोगिता’ अन्तर्गत बिहीबार आदर्शनगर रङ्गशालामा चार वटा रोमाञ्चक खेलहरू सम्पन्न भएका छन् ।
प्रतियोगिताको पहिलो खेलमा गोल्डेन फ्युचर स्कुलले दिएको २३ रनको सामान्य लक्ष्यलाई लिटल फ्लावर स्कुलले कुनै दबाब नलिई सहज रूपमा पछ्याउँदै २५ रन जोडेर सानदार जीत हात पारेको छ । लिटल फ्लावरका खेलाडीहरूले सुरुदेखि नै संयमित ब्याटिङ गर्दै खेल आफ्नो पक्षमा पारेका थिए ।
दोश्रो खेलमा विकन स्कुलले प्रस्तुत गरेको ४९ रनको चुनौतीपूर्ण लक्ष्यलाई सेन्टजेभियर विद्यालयले आत्मविश्वासपूर्ण प्रदर्शनका साथ पछ्याउँदै ५० रन बनायो । यस जितसँगै सेन्टजेभियर विद्यालयले प्रतियोगितामा आफ्नो उपस्थितिलाई थप सशक्त बनाएका थिए ।
त्यसैगरी तेश्रो खेलमा नवदीप स्कुलले दिएको ३८ रनको लक्ष्यलाई ज्ञानवाटिका स्कुलले कुशलतापूर्वक पछ्याउँदै उत्कृष्ट टिमवर्कको नमुना प्रस्तुत गरी विजयी भएको थियो । ज्ञानवाटिकाका खेलाडीहरूले ब्याटिङ र फिल्डिङ दुवै पक्षमा सन्तुलित प्रदर्शन देखाएका थिए ।
दिनको अन्तिम खेलमा कालिकामाई स्कुलले चिल्ड्रेन वर्ल्ड एकेडेमीलाई पराजित गर्दै नकआउट चरणमा आफ्नो स्थानलाई थप बलियो बनाएको छ । अन्तिम खेलसमेत प्रतिस्पर्धात्मक र दर्शकका लागि रोमाञ्चक बनेको थियो ।
खेलकुदले विद्यार्थी विकासमा महत्वपूर्ण भूमिका
रङ्गशालामा उपस्थित अभिभावक, स्थानीयवासी तथा खेलप्रेमी दर्शकहरूले विद्यालयस्तरीय यस्ता खेलकुद प्रतियोगिताले विद्यार्थीहरूको शारीरिक तथा मानसिक विकासमा महत्वपूर्ण योगदान पुर्याउने प्रतिक्रिया दिएका छन् । उनीहरूले खेलकुदमार्फत विद्यार्थीहरूमा अनुशासन, आत्मविश्वास र नेतृत्व क्षमताको विकास हुने उल्लेख गर्दै भविष्यमा पनि यस्ता प्रतियोगितालाई निरन्तरता दिनुपर्ने आवश्यकता औँल्याएका छन् ।
प्रतियोगिता जारी रहेकाले आगामी खेलहरूमा थप उत्साह, प्रतिस्पर्धा र रोमाञ्चक क्षणहरू देखिने अपेक्षा गरिएको छ । 
प्रतिक्रिया दिनुहोस् !