परवानीपुर (बारा), २९ मंसिर । बाराको परवानीपुर गाउँपालिकामा प्रहरीले अनुमति तथा वैधानिक प्रक्रिया बिना स्थानीयको घरमा प्रवेश गरी खानतलासी गरेको आरोपपछि स्थिति तनावग्रस्त बनेको छ । उक्त घटनाप्रति आक्रोश व्यक्त गर्दै स्थानीयवासीहरूले गाउँपालिका कार्यालयमा तालाबन्दी गर्नुका साथै टायर बालेर प्रदर्शनसमेत गरेका छन् ।
स्थानीयहरूका अनुसार परवानीपुर गाउँपालिका वडा नं. ३ निवासी राजेश यादवको घरमा उनी अनुपस्थित रहेका बेला गाउँपालिका प्रहरीले नेपाल प्रहरीसँग मिलेर कुनै लिखित अनुमति वा कानुनी प्रक्रिया नपुर्याई खानतलासी गरेको हो । केही दिनअघि भएको साइकल चोरीको घटनालाई आधार बनाएर केवल शंकाकै भरमा यस्तो कार्य गरिएको उनीहरूको आरोप छ ।
घटनाको विरोधमा सोमबार आक्रोशित स्थानीयहरू गाउँपालिका कार्यालय अगाडि भेला भई टायर बाल्दै प्रदर्शनमा उत्रिएका थिए । प्रदर्शनपछि उनीहरूले गाउँपालिका कार्यालयमा तालाबन्दी गरेका हुन् । उनीहरूले गाउँपालिका अध्यक्षसहित सम्बन्धित जनप्रतिनिधि र कर्मचारीहरूले सार्वजनिक रूपमा स्पष्टीकरण दिनुपर्ने माग गरेका छन् । स्थानीयहरूको भनाइमा, जबसम्म घटनाबारे स्पष्ट जवाफ र न्याय मिल्दैन, तबसम्म तालाबन्दी यथावत् राखिनेछ ।
पीडित राजेश यादवले आफू पेशाले यातायात व्यवसायी रहेको र बजार क्षेत्रमा राम्रो सामाजिक प्रतिष्ठा बनाएको बताए । उनले कुनै पनि प्रमाण वा ठोस आधार बिना आफ्नो घरमा खानतलासी गरिनु आफूलाई बदनाम गराउने नियोजित प्रयास भएको दाबी गरे । ‘मसँग सम्बन्धित कुनै प्रमाण छैन, न त म कुनै आपराधिक गतिविधिमा संलग्न छु । त्यसै पनि शंकाको भरमा घर खानतलासी गर्नुको उद्देश्य मलाई सामाजिक रूपमा बदनाम गराउनु मात्र हो,’ यादवले भने ।
यादवका अनुसार उनी यसअघि गाउँपालिका अध्यक्ष राम क्षत्री प्रसाद कुर्मी आबद्ध नेकपा (एमाले) का सदस्य थिए । तर पछिल्लो राजनीतिक घटनाक्रमपछि पार्टी परित्याग गरेपछि अध्यक्षले राजनीतिक रिसइबी साध्न गाउँपालिका प्रहरी प्रयोग गरेर आफूलाई बदनाम गराउन खोजेको उनको आरोप छ ।
विरोध प्रदर्शनमा सहभागी अर्का स्थानीय युवा प्रकाश यादवले गाउँपालिका वा नगरपालिकालाई कुनैपनि व्यक्तिको घरमा प्रवेश गरी खानतलासी वा सोधपुछ गर्ने कानुनी अधिकार नभएको बताए । उनले गाउँपालिका प्रहरीले आफ्नो मूल जिम्मेवारीभन्दा बाहिर गएर अध्यक्षको पार्टीगत गतिविधिमा बढी सक्रिय भएको आरोप लगाए । ‘गाउँपालिकाको फोहर व्यवस्थापन, पूर्वाधार सुधारजस्ता आधारभूत काममा चासो छैन । कर्मचारीहरू मनलाग्दी रूपमा चलिरहेका छन् । नगर प्रहरी दिनभरि पार्टीको झोला बोकेर हिँड्छन् र शंकाकै भरमा नागरिकको घरमा पुगेर तलासी लिन्छन् । यो सरासर गलत र निन्दनीय हो,’ उनले भने ।
नेपालको संविधानको अनुसूची–८ तथा स्थानीय सरकार सञ्चालन ऐन, २०७४ अनुसार गाउँपालिका तथा नगरपालिकालाई नगर प्रहरी (वा गाउँपालिका प्रहरी) गठन, सञ्चालन र व्यवस्थापन गर्ने अधिकार दिइएको छ । नगर प्रहरीको मुख्य दायित्व स्थानीय शान्ति–सुरक्षा कायम राख्ने, फोहर व्यवस्थापन, ट्राफिक नियमन, बजार व्यवस्थापन, अतिक्रमण नियन्त्रण तथा विपद् व्यवस्थापनमा सहयोग पुर्याउने रहेको छ । तर आपराधिक अनुसन्धान, घर खानतलासी, गिरफ्तारी तथा सोधपुछजस्ता कार्य नेपाल प्रहरीको क्षेत्राधिकारभित्र पर्छन् । नगर प्रहरीलाई यस्ता कार्य गर्न कानुनी अधिकार छैन र उनीहरूले नेपाल प्रहरीको निर्देशन तथा नियन्त्रणमा रही सीमित सहयोगी भूमिका मात्र निर्वाह गर्न सक्ने कानुनी व्यवस्था छ ।
परवानीपुरको घटनामा गाउँपालिका प्रहरीले अनुमति बिना घर खानतलासी गरेको आरोपले स्थानीय सरकारको कानुनी सीमा उल्लंघन भएको हो कि भन्ने गम्भीर प्रश्न उठाएको छ । घटनाबारे बुझ्न गाउँपालिकाका प्रमुख प्रशासकीय अधिकृत मुन्ना साह रौनियारलाई सम्पर्क गर्दा फोन सम्पर्क हुन सकेन । त्यस्तै, जिल्ला प्रहरी कार्यालय बाराका प्रवक्ता प्रहरी नायब उपरीक्षक (डिएसपी) विजयराज पण्डितसँग पनि सम्पर्क हुन नसकेको बताइएको छ । 
प्रतिक्रिया दिनुहोस् !