• हरिशंकर शर्मा
वीरगन्ज, ७ वैशाख / तराईमा गर्मी बढेसँगै पर्सा–बाराको जनजीवन कष्टकर बन्दै गएको छ । तातो हावा तथा बढ्दो गर्मीका कारण पर्सा–बारा सहित तराईको जनजिवन प्रभावित बन्दै गएको हो । एका विहानैदेखि सूर्योदय हुनासाथ चर्किने घामका कारण जिउ चिलाउने र सन स्ट्रक ‘लु’ लागेर मान्छे बेहोस समेत हुने जस्ता समस्याहरु उत्पन्न भएको छ । एक हप्ता यता चलेको तातो हावाका कारण सर्वसाधारणहरु घरबाहिर निस्कन सकेका छैनन् । सरकारी कार्यालय, बैंक तथा वित्तीय संस्थाहरुमा सेवाग्राहीको उपस्थिति घट्दो छ । वृद्धवृद्धा, मजदुर तथा बालबालिकाहरू समेत बढ्दो गर्मीबाट प्रभावित बनेका छन् ।
खास गरेर दैनिक ज्यालादारीमा काम गर्ने मजदुरी गर्नेहरू प्रभावित भएका छन् । रिक्सा, ठेला चालक, साइकलमा सामान बोकेर घरघर पुगी विक्री गर्ने तथा दैनिक ज्यालादारी गरेर जिविकोपार्जन गर्नेहरु यसको चपेटामा नराम्ररी परेका छन् । चर्को गर्मीका कारण बजारमा दिउँसोको समय चहल पहलमा कमि आएपछि मजदुरहरू ग्राहक नपाएर प्रभावित बनेका छन् भने ग्रामीण क्षेत्रबाट किनमेल गर्न आउने ग्राहकहरू नआउँदा व्यापार पनि प्रभावित बनेको छ । गर्मी बढेपछि दिउँसो बजार क्षेत्रमा चहलपहल देखिन छाडेको छ भने कार्यालयमा पनि तुलनात्मक रूपमा सेवाग्राहीको संख्या पातलिएको छ ।
गर्मीले गर्दा सर्वसाधारणहरु विहान र बेलुका मात्रै घर बाहिर निस्कन पाइरहेका छन् । घरबाहिर निस्कन नपाएपछि व्यापार देखि दैनिक काममा पनि कमी आएको स्थानीयहरुको भनाई छ । काम गर्नुपर्ने बाध्यता छ तर चर्को घामले गर्दा गरिरमा विभिन्न किसिमका रोगलाई निम्त्याउने भएको कारण घामबाट बचेर दैनिकी कामकाज गर्ने गरेको स्थानीयहरुको भनाई छ । यसैगरि रिक्सा, ठेला चालकहरुको कमाई पनि घटेको छ । विहान ५ बजेदेखि ९ नबज्दै रिक्सा लिएर घर फर्किनुपर्ने अवस्था छ भने साँझ पुनः ३ बजेदेखि बजारमा काम खोज्न जानुपर्ने अवस्था रहेको रिक्सा चालकहरुको भनाई छ ।
उनीहरुको अनुसार अर्को महिनामा दैनिक १ हजारदेखि १५ सय रुपैयासम्म कमाई हुने गरेकोमा विहानको ९ बजेसम्म ५ सयसम्म मात्रै कमाई हुने गरेको तथा साँझपख सवारी पाए दुई तीनसय थप गरि दैनिक ५ देखि ७ सय रुपैया मात्रै कमाई हुने गरेको बताउँछन् । यस्तो अवस्थामा परिवारलाई कसरी पाल्ने भन्ने चिन्ताले उनीहरुलाई सताएको छ । गर्मीले गर्दा घामको समयमा रिक्सा चलाए विभिन्न प्रकारको समस्या हुने गरेकोले विहान र बेलुका मात्रै मजदुरी गर्ने गरेको उनीहरु बताउँछन् ।
अहिले वीरगन्जको तापक्रम पनि बढेको अवस्था छ । अहिले वीरगन्जको तापक्रम न्यूनतम २३ डिग्री सेल्सियस तथा अधिक्तम ४१ डिग्री सेल्सियससम्म पुग्ने गरेको छ । आज वीरगन्जको तापक्रम न्यून्तम २४ डिग्री सेल्सियस र अधिक्तम ३५ डिग्री सेल्सियससम्म मापन गरिएको छ भने आउँदो शनिबार, आईतबार र सोमबारको तापक्रम न्यून्तम २३ डिग्री सेल्सियस र अधिक्तम ४१ डिग्री सेल्सियससम्म मापन गरिएको बताइएको छ ।
यसरी तराईका जिल्लाहरुमा गर्मी बढेको कारण जनजीवन कष्टकरसँगै विरामीहरुको संख्यामा पनि उत्तिकै वृद्धि भएको छ । गर्मीयाम सुरु भएदेखि नारायणी अस्पतालमा विरामीको चापमा पनि वृद्धि भएको छ । खास गरेर झाडापखाला, ज्वरो, सर्पदंश लगायतका विरामीहरुको संख्यामा वृद्धि हुँदै गएको छ ।
प्रतिक्रिया दिनुहोस् !