वीरगंज (पर्सा), ६ असार । वीरगंज महानगरपालिकाका कार्यवाहक प्रमुख इम्तियाज आलमले महानगरका ३२ वटै वडाका वडा सदस्यसँग अन्तरक्रिया गरेका छन् । शनिबार महानगरपालिकाको सभाकक्षमा आयोजित अन्तरक्रियामा महानगरको समग्र विकास, सुशासन, विकास निर्माणका कार्य तथा प्रभावकारी सेवा प्रवाहका विषयमा छलफल भएको थियो ।
कार्यक्रममा वडा सदस्यहरूले आ–आफ्नो वडामा रहेका आवश्यकता, समस्या तथा विकासका प्राथमिकताबारे धारणा राख्दै विभिन्न सुझाव प्रस्तुत गरेका थिए । उनीहरूले स्थानीय तहमा देखिएका समस्या समाधान, पूर्वाधार विकास, सरसफाइ, सडक निर्माण तथा आधारभूत सेवाको पहुँच विस्तारमा ध्यान दिन आग्रह गरेका थिए । अन्तरक्रियामा महानगरभित्र सञ्चालन भइरहेका विकास आयोजनालाई थप प्रभावकारी बनाउने, जनगुनासोको समयमै सम्बोधन गर्ने तथा नागरिकमैत्री सेवा प्रवाहलाई प्राथमिकता दिने विषयमा समेत छलफल भएको जनाइएको छ ।
वडा सदस्यहरूको सुझाव तथा गुनासो सुनेपछि महानगरका कार्यवाहक प्रमुख आलमले महानगरको समग्र विकास, सुशासन र जनसेवालाई अझ प्रभावकारी तथा नागरिकमुखी बनाउँदै लैजाने प्रतिबद्धता व्यक्त गरेका थिए । जनप्रतिनिधिबीचको सहकार्य र समन्वयलाई थप सुदृढ बनाउँदै नागरिकका अपेक्षाअनुसार सेवा प्रवाहलाई प्रभावकारी बनाइने उनको भनाइ थियो । 
प्रतिक्रिया दिनुहोस् !