गौशाला (महोत्तरी), २२ जेठ । रोजगारीका लागि भारतको हरियाणा पुगेका महोत्तरीको बर्दिबास नगरपालिकाका १६ जना नेपाली बन्धक बनाइएको खबर बाहिरिएपछि परिवारजन चिन्तित बनेका छन् । राम्रो आम्दानी र सुरक्षित भविष्यको आशामा भारत पुगेका बर्दिबास नगरपालिका–१४ स्थित एकीकृत नमुना मुसहर बस्तीका पुरुष, महिला तथा बालबालिकासहित १६ जना नेपाली नागरिक हरियाणाको एक कुखुरा फार्ममा असुरक्षित अवस्थामा रहेको जनाइएको छ ।
स्थानीयका अनुसार उनीहरूलाई गत चैत १३ गते आकर्षक तलब र सुविधा दिलाइदिने आश्वासन दिँदै भारतको हरियाणा राज्य अन्तर्गत झज्जर थाना क्षेत्रको हेलन गाउँस्थित कुखुरा फार्ममा कामका लागि लगिएको थियो । मुसहर बस्तीका मञ्जय सदाका अनुसार आर्थिक अभावका कारण रोजगारीको खोजीमा भारत गएकाहरू अहिले असुरक्षित अवस्थामा छन् । उनीहरूसँग नियमित सम्पर्कसमेत हुन नसकेको उनले बताए ।
पीडितमध्येकी किरण सदाले फोनमार्फत आफूहरूलाई काममा लगाइए पनि पारिश्रमिक नदिइएको, विभिन्न बहानामा नियन्त्रणमा राखिएको तथा मानसिक र शारीरिक दुर्व्यवहार गरिएको जानकारी दिएपछि मात्रै परिवारजनले उनीहरू बन्धक बनाइएको थाहा पाएका थिए ।
यस्तै, अर्का स्थानीय कारी सदाले कुखुरा फार्ममा कामका लागि लगिए पनि अन्य विभिन्न काममा लगाउने गरिएको र तलबसमेत नदिएको बताए । उनका अनुसार त्यहाँ रहेका नेपालीहरूलाई अनावश्यक शारीरिक तथा मानसिक यातना दिने गरिएको छ । पीडित परिवारले खोजतलास, उद्धार तथा दोषीमाथि कारबाहीको माग गर्दै इलाका प्रहरी कार्यालयमार्फत नयाँदिल्लीस्थित नेपाली दूतावासमा निवेदन पठाएका छन् । त्यसपछि उनीहरूको खोजतलास सुरु गरिएको जनाइएको छ ।
यता भारतस्थित नेपाली दूतावासले समेत पीडितहरूको उद्धार प्रक्रिया अगाडि बढाएको स्रोतले जनाएको छ । 
प्रतिक्रिया दिनुहोस् !