वीरगंज (पर्सा), २ साउन । वीरगंजको विद्युत आपूर्तिको प्रमुख आधार मानिएको छपकैया ३३ केभी अन्डरग्राउन्ड केबलमा आएको प्राविधिक खराबी (फल्ट) तीन दिन र तीन रातको निरन्तर खोजीपछि पत्ता लागेको छ । नेपाल विद्युत प्राधिकरण, वीरगंज वितरण केन्द्रले मर्मत कार्य अन्तिम चरणमा पुगेको र विद्युत आपूर्ति पूर्ण रूपमा सहज बनाउन आवश्यक काम तीव्र गतिमा भइरहेको जनाएको छ ।
प्राधिकरणका अनुसार केबलमा समस्या देखिएलगत्तै उच्च व्यवस्थापनको समन्वयमा विशेष Fault Locator Megger Testing Van रातारात वीरगंज ल्याएर परीक्षण सुरु गरिएको थियो । प्रारम्भिक चरणमा रातभर गरिएको परीक्षणबाट फल्टको स्थान पहिचान हुन नसकेपछि छपकैया सबस्टेसनअन्तर्गत सञ्चालित अस्पताल, विर्तामाई, नगवा, छपकैया र बलिरामपुर फिडरमध्ये बलिरामपुर, छपकैया र नगवा फिडरको विद्युत सेवा प्रभावित भएको थियो ।
लामो समयसम्म विद्युत सेवा अवरुद्ध नहोस् भन्ने उद्देश्यले प्राधिकरणले भोलिपल्टदेखि नै प्रभावित सबै क्षेत्रमा वैकल्पिक आपूर्ति व्यवस्था मिलाएको जनाएको छ, जसका कारण उपभोक्ताले पूर्ण रूपमा विद्युतविहीन हुनुपरेको अवस्था सिर्जना भएन । प्राविधिक टोलीले लगातार तीन दिन र तीन रात खटिएपछि नगवा पोखरी नजिक अन्डरग्राउन्ड केबलमा आएको खराबीको यथार्थ स्थान पत्ता लगाउन सफल भएको हो । सोही क्षेत्रमा निर्माणाधीन पसौंनी–छपकैया ३३ केभी ओभरहेड लाइन सम्पन्न भइसकेकाले पुरानो लाइन नकटाई मर्मत कार्य अघि बढाउन सहज भएको प्राधिकरणले जनाएको छ ।
वर्षायामको प्रतिकूल मौसम, केही स्थानीयको अवरोध तथा अन्य प्राविधिक चुनौतीका बाबजुद वीरगंज वितरण केन्द्रका कर्मचारी, प्राविधिक टोली र निर्माण व्यवसायीले निरन्तर खटेर निर्माणाधीन पसौंनी–छपकैया ३३ केभी ओभरहेड लाइन दुई दिनमै सम्पन्न गरी सफलतापूर्वक चार्ज गर्न सफल भएको पनि प्राधिकरणले उल्लेख गरेको छ । वीरगंज वितरण केन्द्रले कठिन परिस्थितिमा धैर्य र सहयोगका साथ साथ दिने स्थानीय उपभोक्ता, स्थानीय प्रशासन, सञ्चारकर्मी, निर्माण व्यवसायी तथा प्राधिकरणको उच्च व्यवस्थापनप्रति आभार व्यक्त गरेको छ ।
प्राधिकरणका अनुसार नयाँ ३३ केभी ओभरहेड लाइन सञ्चालनमा आएपछि वीरगंजको विद्युत आपूर्ति प्रणाली अझ भरपर्दो, गुणस्तरीय र नियमित बन्ने अपेक्षा गरिएको छ । यसलाई वीरगंजको विद्युत पूर्वाधार सुदृढीकरणतर्फको महत्वपूर्ण उपलब्धि र दीर्घकालीन सुधारको कोसेढुंगाका रूपमा समेत लिइएको छ ।
प्रतिक्रिया दिनुहोस् !