राजविराज (सप्तरी), २ साउन । सप्तरीको राजविराजस्थित जिल्ला कारागारमा जेलर रूपक मण्डलको सरुवाको माग गर्दै कैदीबन्दीहरूले सुरु गरेको आन्दोलनले तनावपूर्ण रूप लिएको छ । तीन दिनदेखि जारी आन्दोलनका क्रममा प्रहरीले हस्तक्षेप गर्न खोजेपछि केही कैदीबन्दीले शरीरमा मट्टीतेल खन्याएर आत्मदाहको प्रयास गरेपछि अवस्था झन् संवेदनशील बनेको हो ।
राजविराज नगरपालिका–६ स्थित कारागारमा जेलर मण्डलले चौकीदार नियुक्तिको नाममा आर्थिक अनियमितता गर्दै कैदीबन्दीबाट रकम असुलेको आरोप लगाउँदै आन्दोलन सुरु गरिएको हो । आन्दोलनरत कैदीबन्दीहरूले जेलरको तत्काल सरुवा, घटनाको निष्पक्ष छानबिन तथा दोषीमाथि आवश्यक कारबाहीको माग गरेका छन् ।
आन्दोलन नियन्त्रणका लागि प्रहरी परिचालन भई बल प्रयोग गर्न खोजेपछि केही कैदीबन्दीले शरीरमा मट्टीतेल खन्याएर आत्मदाहको प्रयास गरेको स्रोतले जनाएको छ । त्यसपछि थप अप्रिय घटना हुन नदिन प्रहरी पछि हटेको बताइएको छ । राजविराज–१५ मुसहरनियाँका कैदी धर्नेन्द्रप्रसाद साहले आफूलाई चौकीदार नियुक्त गराइदिने आश्वासन दिँदै चौकीदार कामेश्वर यादवले गत जेठ ५ गते कारागार बाहिरका विनोद यादवमार्फत जेलर रूपक मण्डलको नाममा आफूबाट पाँच लाख रुपैयाँ घुस लिएको आरोप लगाएका छन् ।
यता चौकीदार नियुक्तिसम्बन्धी रकम उठाएको विषयमा विवाद चर्किएपछि चौकीदार कामेश्वर यादवलाई झुम्का कारागार सरुवा गर्ने तयारी गरिएको र त्यसैक्रममा ‘बी ब्लक’का केही कैदीबन्दीमाथि कुटपिट भएको आरोपसमेत सार्वजनिक भएको छ । घटनापछि कारागार परिसरको सुरक्षा व्यवस्था कडा पारिएको छ । नेपाल प्रहरी र सशस्त्र प्रहरी बलको ठूलो टोली परिचालन गरिएको छ भने सुरक्षा संवेदनशीलताको कारण देखाउँदै सञ्चारकर्मीलाई घटनास्थलमा पुगेर समाचार सङ्कलन गर्नसमेत रोक लगाइएको बताइएको छ ।
जिल्ला प्रशासन कार्यालय सप्तरीका प्रमुख जिल्ला अधिकारी रामकृष्ण थापाले कारागारभित्र शान्ति–सुरक्षा कायम गर्न प्रहरी प्रवेश गर्न खोज्दा केही कैदीबन्दीले शरीरमा मट्टीतेल खन्याएको पुष्टि गरेका छन् । उनका अनुसार अहिले कैदीबन्दीसँग संवाद र सम्झाइबुझाइ जारी रहेकाले अवस्था सामान्य बन्दै गएको छ । प्रमुख जिल्ला अधिकारी थापाले ‘बी ब्लक’का चौकीदार रामरिझनले कैदीबन्दीप्रति समान व्यवहार नगरेको आरोपपछि विवाद सुरु भएको प्रारम्भिक जानकारी प्राप्त भएको पनि बताएका छन्। घटनाको थप अनुसन्धान भइरहेको प्रशासनले जनाएको छ ।
प्रतिक्रिया दिनुहोस् !