वीरगंज (पर्सा), १० जेठ । सशस्त्र प्रहरी बल नेपालको ‘सीमाबासीसँग सशस्त्र प्रहरी कार्यक्रम’ अन्तर्गत वीरगंज महानगरपालिका–२२ मनिहारीकी विपन्न एकल दलित महिला छिमी मलिलाई नवनिर्मित घर हस्तान्तरण गरिएको छ । आर्थिक अभावका कारण वर्षौंदेखि कष्टकर जीवन बिताउँदै आएकी मलिलाई सुरक्षित आवास उपलब्ध गराउने उद्देश्यले घर निर्माण गरिएको हो ।
स्वर्गीय चोकट मलिकी पत्नी छिमी मलिको कमजोर आर्थिक अवस्था र असुरक्षित बसोबासलाई ध्यानमा राख्दै सशस्त्र प्रहरी बल नेपाल नं. १३ गण हे.क्वा. पर्साले स्थानीय जनप्रतिनिधि तथा सहयोगी व्यक्तिहरूसँगको सहकार्यमा घर निर्माण गरेको जनाएको छ । सशस्त्र प्रहरीको जनशक्ति परिचालनमार्फत निर्माण सम्पन्न गरिएको उक्त घर आइतबार आयोजित एक कार्यक्रमबीच हस्तान्तरण गरिएको हो ।
सशस्त्र प्रहरी बल नेपाल नं. १३ गण हे.क्वा. पर्साका सूचना अधिकारी मोहन राज निरौला ले वर्षौंदेखि अस्थायी तथा जोखिमयुक्त टहरामा बस्दै आएकी मलिलाई सुरक्षित आवास उपलब्ध गराउने उद्देश्यले घर निर्माण गरिएको जानकारी दिए । उनले सशस्त्र प्रहरीले सीमा सुरक्षाका अतिरिक्त सामाजिक उत्तरदायित्वअन्तर्गत विपन्न, असहाय तथा सीमान्तकृत समुदायको जीवनस्तर उकास्न विभिन्न जनसेवामूलक कार्यक्रम सञ्चालन गर्दै आएको बताए ।
नयाँ घर प्राप्त गरेपछि छिमी मलिले आफ्नो सुरक्षित आवासको सपना पूरा भएको भन्दै सशस्त्र प्रहरी बलप्रति आभार व्यक्त गरेकी छन् । स्थानीयवासीले समेत सशस्त्र प्रहरीको यस पहललाई सामाजिक उत्तरदायित्वको उदाहरणीय कार्यका रूपमा प्रशंसा गरेका छन् । कार्यक्रमले सुरक्षा निकाय र स्थानीय समुदायबीचको सम्बन्धलाई थप मजबुत बनाउनुका साथै विपन्न परिवारप्रति राज्य संयन्त्रको मानवीय संवेदनशीलता पनि उजागर गरेको सहभागीहरूको भनाइ थियो । 
प्रतिक्रिया दिनुहोस् !