वीरगंज (पर्सा), २२ वैशाख । जनमत पार्टीले मधेश प्रदेश संसदीय दलमा नेतृत्व परिवर्तन गर्दै महेश प्रसाद यादवलाई जिम्मेवारीबाट हटाएको छ । उनको स्थानमा चन्दनकुमार सिंहलाई नयाँ संसदीय दलको नेता तोकिएको छ । पार्टी अध्यक्ष सीके राउतले सोमबार जारी गरेको विज्ञप्तिमार्फत् यो निर्णय सार्वजनिक गरेका हुन् । विज्ञप्तिमा आजकै मितिबाट लागू हुने गरी नेतृत्व हेरफेर गरिएको उल्लेख गरिएको छ । यसअघि प्रमुख सचेतक रहेका सिंह पार्टीका महासचिवसमेत हुन् ।
मधेश प्रदेश सरकारलाई दिएको समर्थन कायम राख्ने वा फिर्ता लिने विषयमा जनमत पार्टीभित्र मतभेद देखिँदै आएको छ । यसैबीच, सिंहको नेतृत्वमा बहुमत प्रदेश सांसदहरूले मधेश सरकारबाट समर्थन फिर्ता लिएको पत्र प्रदेश प्रमुखसमक्ष बुझाएका थिए । तर त्यसको करिब १२ घण्टापछि तत्कालीन नेता यादवले भने समर्थन यथावत रहेको भन्दै छुट्टै पत्र पेश गरेका थिए ।
सिंहका अनुसार पार्टी अध्यक्ष राउतसँगको परामर्शमा बहुमत सांसदले सरकारलाई दिएको समर्थन फिर्ता लिने निर्णय गरेका हुन् । उक्त पत्रमा जनमतका ९ जना प्रदेश सांसदहरूको हस्ताक्षर रहेको छ । हाल प्रदेश सभामा जनमत पार्टीका १२ सदस्य छन्, जसमा बबिताकुमारी राउत उपसभामुख पदमा छिन् । पार्टीबाट महेश यादव अर्थमन्त्री तथा बसन्त कुशवाहा युवा तथा समाजकल्याण मन्त्रीका रूपमा सरकारमा छन् ।
मधेश प्रदेशमा एमालेबाहेकका दलहरूको गठबन्धन सरकार सञ्चालनमा छ । जनमतका सांसदहरूको पछिल्लो कदमले कांग्रेस नेतृत्वको सरकारविरुद्ध नयाँ समीकरण बन्ने संकेत देखिएको छ । १०७ सदस्यीय प्रदेश सभामा सरकार गठनका लागि ५४ सांसद आवश्यक पर्छन् ।
हालको अवस्था अनुसार एमालेका २४, कांग्रेसका २२, जसपा नेपालका १८, जनमतका १२, माओवादी केन्द्रका ९, लोसपाका ८ र एकीकृत समाजवादीका ७ सांसद छन् । साथै, राप्रपा नेपाल, नागरिक उन्मुक्ति पार्टी र नेपाल सङ्घीय समाजवादी पार्टीका एक–एक सदस्य रहेका छन् ।
प्रतिक्रिया दिनुहोस् !