वीरगंज (पर्सा), २९ चैत । पर्साको कालिकामाई गाउँपालिकामा आयोजित दोस्रो गाउँपालिका स्तरीय उपमेयर कप टी–२० क्रिकेट प्रतियोगिताको उपाधि पोखरिया क्रिकेट क्लबले जितेको छ । मुडली क्रिकेट क्लबको आयोजनामा तथा गाउँपालिकाको सहयोगमा सम्पन्न प्रतियोगिताको फाइनल खेल अत्यन्त प्रतिस्पर्धात्मक बनेको थियो ।
फाइनलमा कालिकामाई क्रिकेट क्लब र पोखरिया क्रिकेट क्लबबीच भएको भिडन्तमा कालिकामाईले टस जितेर पहिले ब्याटिङ गर्दै निर्धारित २० ओभरमा ४ विकेट गुमाएर २५० रनको विशाल योगफल तयार पारेको थियो । जवाफी ब्याटिङमा उत्रिएको पोखरिया क्रिकेट क्लबले आक्रामक प्रदर्शन गर्दै १८ ओभरमै ६ विकेट गुमाएर २५६ रन बनाउँदै रोमाञ्चक जित हात पारेको हो ।
पोखरियाका कप्तान इरसाद मियाँले उत्कृष्ट प्रदर्शन गर्दै १५६ रनको विस्फोटक इनिङ खेलेका कारण ‘म्यान अफ द म्याच’ घोषित भए । विजेता टोली पोखरिया क्रिकेट क्लबलाई नगद ५० हजार ५१ रुपैयाँसहित शिल्ड प्रदान गरिएको थियो । उक्त पुरस्कार पूर्व उद्योग, वाणिज्य तथा आपूर्ति मन्त्री रमेश रिजालले हस्तान्तरण गरेका थिए । उपविजेता कालिकामाई क्रिकेट क्लबले नगद २५ हजारसहित दोस्रो शिल्ड प्राप्त गरेको छ, जुन गाउँपालिका उपाध्यक्ष राजमती देवी बरैनीले प्रदान गरिन् ।
कार्यक्रममा बोल्दै पूर्व मन्त्री रिजालले खेलले युवाको शारीरिक तथा मानसिक विकासमा महत्वपूर्ण भूमिका खेल्ने उल्लेख गर्दै स्थानीय खेलकुदलाई प्राथमिकता दिनुपर्ने बताए । उनले आगामी दिनमा खेल क्षेत्रको विकासका लागि आफूले सक्दो सहयोग गर्ने प्रतिबद्धता समेत जनाए ।
मुडलीस्थित खेलमैदानमा सम्पन्न प्रतियोगिता गाउँपालिका अध्यक्ष बुलट पटेलको अध्यक्षतामा सम्पन्न भएको थियो । कार्यक्रममा उपाध्यक्ष राजमती देवी बरैनी, नेपाली कांग्रेस पर्साका प्रवक्ता रमेश पाण्डे, कोषाध्यक्ष प्रेम थापा, वाणिज्य अधिकृत सुनिल चौरसिया, वडा अध्यक्ष लालबाबु चौरसिया लगायत विभिन्न जनप्रतिनिधि, नेता, खेलाडी तथा दर्शकहरूको उल्लेखनीय उपस्थिति रहेको थियो ।
प्रतियोगितामा कुल ८ वटा टोलीको सहभागिता रहेको थियो । साथै, खेललाई थप रोमाञ्चक बनाउन प्रत्येक छक्कामा १ हजार रुपैयाँ पुरस्कार दिने घोषणा वडा अध्यक्ष लालबाबु चौरसियाले गरेका थिए । सोही अनुसार खेलभर ५४ वटा छक्का प्रहार हुँदा कुल ५४ हजार रुपैयाँ नगद वितरण गरिएको थियो । प्रतियोगिताले स्थानीयस्तरमा क्रिकेटप्रतिको आकर्षण र उत्साह झन् बढाएको देखिएको छ । 
प्रतिक्रिया दिनुहोस् !