वीरगंज (पर्सा), २१ चैत । पर्साको कालिकामाई गाउँपालिकामा गाउँपालिका स्तरीय ‘उपमेयर कप’ टी–२० क्रिकेट प्रतियोगिता शुक्रबारदेखि सुरु भएको छ । गाउँपालिकाको सहयोग तथा मुडली क्रिकेट क्लबको आयोजनामा सञ्चालन भएको प्रतियोगिताको उद्घाटन एक औपचारिक कार्यक्रमबीच पूर्व उद्योग, वाणिज्य तथा आपूर्ति मन्त्री रमेश रिजालले फिता काट्दै र ब्याटिङ गर्दै गरेका हुन् ।
उद्घाटन समारोहमा प्रमुख अतिथिका रूपमा सम्बोधन गर्दै रिजालले देश निर्माणमा युवाको भूमिका खेलकुदजत्तिकै महत्वपूर्ण रहेको बताए । खेलकुदले युवाको शारीरिक तथा मानसिक विकासमा टेवा पुर्याउनुका साथै स्थानीय तहको पहिचानलाई राष्ट्रिय तथा अन्तर्राष्ट्रिय स्तरमा पुर्याउने भएकाले यसलाई प्राथमिकतामा राख्नुपर्ने उनले जोड दिए । आगामी दिनमा आफू तथा मधेश प्रदेशको तर्फबाट खेल क्षेत्रलाई आवश्यक सहयोग उपलब्ध गराइने प्रतिबद्धता पनि उनले व्यक्त गरे ।
वडा नं. १ मुडलीस्थित खेल मैदानमा भइरहेको प्रतियोगितामा आयोजक कालिकामाई क्रिकेट क्लबसँगै धोबिनी गाउँपालिका, पोखरिया नगरपालिका र बिन्दबासिनी गाउँपालिका लगायतका टोलीहरू सहभागी छन् । प्रतियोगितामा कुल आठ वटा टिमको सहभागिता रहने आयोजकले जनाएको छ ।
क्रिकेट क्लब मुडलीका अध्यक्ष बुलट पटेलको अध्यक्षतामा सम्पन्न उद्घाटन कार्यक्रममा गाउँपालिकाकी उपाध्यक्ष राजमती देवी बरैनी, अध्यक्ष पदका उम्मेदवार अजय पटेल, नेपाली कांग्रेसका महाधिवेशन प्रतिनिधि वशिष्ठनारायण कुर्मी, श्रीकान्त यादव, पर्सा कांग्रेसका कोषाध्यक्ष प्रेम थापा लगायत स्थानीय नेता, जनप्रतिनिधि, खेलाडी र दर्शकहरूको उल्लेख्य उपस्थिति रहेको थियो ।
प्रतियोगिताको पहिलो दिन भएका खेलहरूमा कालिकामाई गाउँपालिकाले ११८ रन बनाएको थियो भने धोबिनी गाउँपालिकाले ११९ रन बनाउँदै जित हात पारेको छ । त्यसैगरी अर्को खेलमा पोखरिया नगरपालिकाले १६४ रनको लक्ष्य प्रस्तुत गर्दा बिन्दबासिनी गाउँपालिका १४१ रनमै समेटिएपछि पोखरिया विजयी भएको आयोजकले जनाएको छ । 
प्रतिक्रिया दिनुहोस् !