वीरगंज (पर्सा), ४ चैत । पर्सामा सक्रिय विभिन्न राजनीतिक दलहरूले प्रतिनिधिसभा सदस्य उम्मेदवार मनोज कुमार चौधरीसँग जोडिएको घटनाबारे संयुक्त धारणा सार्वजनिक गर्दै निष्पक्ष अनुसन्धानको माग गरेका छन् । नेपाली कम्युनिष्ट पार्टी पर्साको पहलमा चैत्र ३ गते बसेको सर्वदलीय बैठकपछि जारी गरिएको संयुक्त प्रेस विज्ञप्तिमा घटनाप्रति गम्भीर चासो व्यक्त गर्दै सम्बन्धित निकायलाई तत्काल ध्यान दिन आग्रह गरिएको हो । विज्ञप्तिमा चौधरीलाई एक जिम्मेवार, मिलनसार तथा सक्रिय राजनीतिक व्यक्तित्वका रूपमा उल्लेख गरिएको छ ।
विज्ञप्तिमा उल्लेख गरिएअनुसार, २०८२ फागुन १९ गते साँझ वीरगंज फर्किने क्रममा सुरक्षा जाँचका बेला चौधरी सवार गाडीको डिकीबाट शंकास्पद वस्तु फेला परेको भन्दै उनीसहित चार जनालाई प्रहरीले नियन्त्रणमा लिएको थियो । तर, घटनाको १६ दिन बितिसक्दा पनि उक्त वस्तुको प्रकृति, त्यसको स्रोत तथा उद्देश्यबारे स्पष्ट जानकारी सार्वजनिक हुन नसकेको भन्दै दलहरूले चिन्ता व्यक्त गरेका छन् ।
राजनीतिक रूपमा सक्रिय व्यक्तित्व तथा उम्मेदवार नै रहेको अवस्थामा आफ्नै गाडीमा विस्फोटक पदार्थ बोकेर हिँड्नु अस्वाभाविक देखिने भन्दै विज्ञप्तिमा घटनामा कुनै षड्यन्त्र हुन सक्ने आशंका व्यक्त गरिएको छ । साथै, घटनाको भोलिपल्ट अन्य स्थानमा फेला परेको वस्तुसँग जोडेर घटनालाई थप जटिल बनाउने प्रयास भइरहेको संकेत पनि गरिएको छ ।
दलहरूले अनुसन्धान प्रक्रिया अनावश्यक रूपमा लम्ब्याएर मनोवैज्ञानिक दबाब सिर्जना गरिँदै निर्दोष व्यक्तिहरूलाई फसाउने प्रयास भइरहेको हुनसक्ने आशंका समेत व्यक्त गरेका छन् । उनीहरूले ढिलाइ नगरी निष्पक्ष छानबिन सम्पन्न गरी यथाशीघ्र न्यायिक प्रक्रिया अघि बढाउन सम्बन्धित निकायसँग माग गरेका छन् । ‘ढिलो गर्नु न्याय नदिनु सरह हो,’ भन्ने भनाइ उद्धृत गर्दै विज्ञप्तिमा तत्काल अनुसन्धान प्रतिवेदन सार्वजनिक गर्न र आवश्यक कारबाही प्रक्रिया अघि बढाउन जोड दिइएको छ । साथै, आफ्नो सहनशीलतालाई कमजोरी नठान्न चेतावनी दिँदै अवस्था जटिल बने थप कदम चाल्न बाध्य हुने संकेत समेत गरिएको छ ।
उक्त संयुक्त विज्ञप्तिमा रामनारायण कुर्मी (नेपाली काँग्रेस), सुन्दर कुर्मी (नेकपा एमाले), रामनरेश यादव (जसपा नेपाल), तबरेज अहमद (जसपा), ओमप्रकाश सर्राफ (जनमत पार्टी), अमिताभ बचन दास (प्रलोप), पन्नालाल पटेल (राप्रपा), हिमाल चन्द्र गौतम (राष्ट्रिय जनमोर्चा), धनबहादुर श्रेष्ठ (वैज्ञानिक समाजवादी पार्टी), बिरेन्द्र कण्ठ (पिपुल फस्ट पार्टी) तथा बालगोपाल थापा र रामदरश कुशवाहा (नेपाली कम्युनिष्ट पार्टी) लगायतका नेताहरूको हस्ताक्षर रहेको छ ।
यसैक्रममा, विभिन्न दलका प्रतिनिधिहरूले भोला दाहाल, प्रमुख जिल्ला अधिकारी, सँग भेट गरी घटनाबारे छलफल गरेका छन् । उक्त भेटमा सुदिप राज पाठक, पर्सा प्रहरी प्रमुख, लगायतको उपस्थिति रहेको थियो । दलहरूको संयुक्त धारणा सार्वजनिक भएसँगै चौधरी प्रकरणले पर्साको राजनीतिक वृत्तमा थप चर्चा र चासोको विषय बनेको छ ।
प्रतिक्रिया दिनुहोस् !