वीरगंज (पर्सा), २७ फागुन । जिल्ला प्रशासन कार्यालय पर्साले पर्सा जिल्लामा खाना पकाउने एलपी ग्यास, पेट्रोल र डिजेलको कुनै अभाव नरहेको स्पष्ट पार्दै सर्वसाधारणलाई अनावश्यक रूपमा जगेडा वा भण्डारण नगर्न आग्रह गरेको छ । बुधबार निमित्त प्रमुख जिल्ला अधिकारी विनोद कुमार पोखरेलको अध्यक्षतामा बसेको सरोकारवालाहरूको बैठकले ग्यास तथा पेट्रोलियम पदार्थको आपूर्ति अवस्था, सम्भावित अभाव र उपभोक्ता हितविपरीत हुने गतिविधि नियन्त्रणका विषयमा विस्तृत छलफल गर्दै विभिन्न निर्णय गरेको हो ।
बैठकमा नेपाल आयल निगम तथा ग्यास विक्रेता संघ र उद्योगहरूले उपलब्ध गराएको विवरणअनुसार पर्सामा ग्यास, पेट्रोल र डिजेलको मौज्दात पर्याप्त रहेको जानकारी गराइएको थियो । साथै पेट्रोलियम पदार्थको आयात पनि नियमित रूपमा भइरहेकाले जिल्लामा हाल कुनै किसिमको अभाव नरहेको र निकट भविष्यमा पनि अभाव हुने अवस्था नदेखिएको निष्कर्ष बैठकले निकालेको प्रशासनले जनाएको छ ।
बैठकले ग्यास, पेट्रोल र डिजेलको अनावश्यक रूपमा जम्माखोरी गर्ने तथा कृत्रिम अभाव सिर्जना गर्ने गतिविधि रोक्न सार्वजनिक सूचना जारी गर्ने निर्णय गरेको छ । यसका साथै पेट्रोल र डिजेललाई ग्यालेन, ड्रम जस्ता माध्यमबाट खुला रूपमा बिक्री–वितरण नगर्न तथा त्यस्ता कार्य रोक्न आवश्यक कदम चाल्ने निर्णय पनि गरिएको छ । त्यस्तै, ग्यास डिलरहरूले बिक्री गरेका सिलिण्डरको विवरण उपभोक्ताको नाम, थर, ठेगाना र सम्पर्क नम्बर सहित दैनिक रूपमा सम्बन्धित उद्योगलाई उपलब्ध गराउनुपर्ने निर्णय गरिएको छ ।
ग्यास उद्योगहरूले पनि आफ्ना डिलरहरूलाई बिक्री गरेको ग्यास सिलिण्डरको परिमाणसहितको दैनिक विवरण जिल्ला प्रशासन कार्यालय पर्सा, वाणिज्य आपूर्ति तथा उपभोक्ता संरक्षण कार्यालय वीरगंज तथा नेपाल आयल निगम को पर्सा शाखामा इमेलमार्फत अनिवार्य रूपमा पठाउनुपर्ने व्यवस्था गरिएको छ ।
जिल्ला प्रशासन कार्यालयमा सम्पन्न उक्त बैठकमा जिल्ला प्रहरी कार्यालय पर्साका प्रहरी नायब उपरीक्षक राजु कार्की, वाणिज्य आपूर्ति तथा उपभोक्ता संरक्षण कार्यालय वीरगन्जका सुनिल चौरसिया, नेपाल आयल निगमका मोहन कुमार सिंह, वीरगंज उद्योग वाणिज्य संघका मनोज कुमार दास तथा उपभोक्ता मञ्च नेपाल का दिना गुप्ता लगायत सरोकारवालाहरूको उपस्थिति रहेको थियो ।
प्रतिक्रिया दिनुहोस् !