वीरगंज (पर्सा), १५ फागुन । नेपाल कम्युनिष्ट पार्टी (एमाले)का तर्फबाट पर्सा निर्वाचन क्षेत्र नं.–३ का प्रतिनिधिसभा सदस्य उम्मेदवार रुपेश पाण्डेयले चुनावी घरदैलो अभियानलाई निरन्तरता दिएका छन् । शुक्रबार उनले पोखरिया नगरपालिका–९ अन्तर्गत रानीगञ्ज र रहरिया टोलमा पुगेर मतदातासँग प्रत्यक्ष संवाद गरेका हुन् ।
घरदैलोका क्रममा पाण्डेयले स्थानीय बासिन्दासँग घरघरमै भेटघाट गर्दै उनीहरूका समस्या, आवश्यकता र अपेक्षाबारे जानकारी संकलन गरे । भेटघाटमा सहभागीहरूले सुरक्षित खानेपानीको व्यवस्था, सडक स्तरोन्नति, गुणस्तरीय शिक्षा, प्रभावकारी स्वास्थ्य सेवा तथा युवाका लागि रोजगारी सिर्जनाजस्ता मुद्दा प्राथमिकताका साथ उठाएका थिए ।
स्थानीयका सुझाव र गुनासो सुनेपछि पाण्डेयले क्षेत्रको समग्र विकास आफ्नो मुख्य एजेन्डा रहेको स्पष्ट पारे । आधारभूत पूर्वाधार निर्माणलाई गति दिने, कृषि क्षेत्रलाई आधुनिकीकरण र प्रवद्र्धनमार्फत उत्पादनमुखी बनाउने तथा साना–मझौला उद्यम विस्तार गरी युवालाई स्वरोजगार र रोजगारीका अवसर उपलब्ध गराउने योजना उनले प्रस्तुत गरे । जनताबाट प्राप्त सुझावलाई आगामी नीति तथा कार्यक्रम निर्माणमा समेटेर प्रभावकारी कार्यान्वयन गरिने प्रतिबद्धता समेत उनले व्यक्त गरे ।
घरदैलो कार्यक्रममा स्थानीय नेता–कार्यकर्ता र समर्थकहरूको उल्लेखनीय उपस्थिति देखिएको थियो । चुनावी अभियानलाई थप सशक्त बनाउँदै पाण्डेयले क्षेत्रका अन्य वडाहरूमा पनि निरन्तर भेटघाट र जनसम्पर्क कार्यक्रम सञ्चालन गर्ने जानकारी दिएका छन् । 
प्रतिक्रिया दिनुहोस् !