वीरगंज (पर्सा), ११ फागुन । राष्ट्रिय स्वतन्त्र पार्टीका पर्सा जिल्ला सभापति तथा पर्सा–१ का प्रतिनिधिसभा उम्मेदवार हरि पन्त वीरगंज–१८ भवानिपुरमा सबै उमेर समूहको साझा रोजाइका रूपमा प्रस्तुत भएका छन् । भवानीपुरमा सम्पन्न घरदैलो तथा मतदाता भेटघाट कार्यक्रममा जेनेजीदेखि युवा, प्रौढ र ज्येष्ठ नागरिकसम्मको उल्लेख्य सहभागिता देखिएको थियो । टोल टोलमा पुगेका पन्तलाई स्थानीयवासीले उत्साहपूर्वक स्वागत गरेका थिए । खुला संवाद, आत्मीय भेटघाट र सामूहिक उपस्थितिले क्षेत्रको चुनावी वातावरणलाई थप उर्जा दिएको सहभागीहरूले बताएका छन् ।
कार्यक्रममा विभिन्न पेशा, व्यवसाय तथा सामाजिक क्षेत्रसँग आबद्ध व्यक्तिहरूको सक्रिय सहभागिता रहेको थियो । स्थानीय प्रभावशाली अगुवा र समाजसेवीहरूको उपस्थितिले अभियानलाई थप अर्थपूर्ण बनाएको आयोजक पक्षको दाबी छ । भेटघाटका क्रममा धेरै स्थानीयले परम्परागत राजनीतिक दलप्रति निराशा बढ्दै गएको र नयाँ विकल्पको खोजी नै आफ्नो समर्थनको मुख्य कारण भएको बताएका छन् । एक युवा सहभागीले भने, ‘हामीलाई पारदर्शी र जवाफदेही नेतृत्व चाहिएको छ । परिवर्तनको सम्भावना हामीले पन्तजीमा देखेका छौं ।’
सहभागीहरूले सुशासन, भ्रष्टाचार नियन्त्रण र युवालाई निर्णय प्रक्रियामा अग्रस्थानमा राख्ने प्रतिबद्धताले आफूहरूलाई रास्वपातर्फ आकर्षित गरेको उल्लेख गरे । देशव्यापी रूपमा देखिएको वैकल्पिक राजनीतिप्रतिको आकर्षण भवानिपुरमा पनि स्पष्ट झल्किएको उनीहरूको भनाइ छ । कार्यक्रमलाई सम्बोधन गर्दै पन्तले जनताको भरोसालाई केवल मतमा सीमित नराखी विकास र सुशासनको ठोस परिणाममा रूपान्तरण गर्ने प्रतिवद्धता जनाए । ‘राजनीति पद प्राप्तिका लागि होइन, सेवा र परिवर्तनका लागि हुनुपर्छ,’ उनले भने, ‘भवानिपुरवासीले देखाएको विश्वास मेरो लागि ठूलो जिम्मेवारी हो, जसलाई परिणामबाट पुष्टि गर्नेछु ।’
पर्सा–१ अन्तर्गत पर्ने भवानीपुर क्षेत्र चुनावी दृष्टिले पछिल्लो समय महत्वपूर्ण मानिँदै आएको छ । यहाँ युवा मतदाताको संख्या उल्लेख्य रहेकाले समर्थन निर्णायक बन्न सक्ने राजनीतिक विश्लेषकहरूको आकलन छ । घरदैलो अभियानपछि भवानिपुरमा पन्तको पक्षमा सकारात्मक लहर देखिएको समर्थकहरूको दाबी छ । आगामी निर्वाचनमा यस क्षेत्रको मत परिणामले पर्सा–१ को समग्र चुनावी समीकरणमा महत्वपूर्ण प्रभाव पार्न सक्ने अनुमान गरिएको छ । 
प्रतिक्रिया दिनुहोस् !