वीरगंज (पर्सा), ११ फागुन । पर्सा निर्वाचन क्षेत्र नं. २ मा प्रतिनिधिसभा सदस्यका उम्मेदवार अशोक कुमार टेमानीले चुनावी गतिविधिलाई तीव्र बनाएका छन् । जनता समाजवादी पार्टी, नेपाल (जसपा) का उम्मेदवार टेमानीले सोमबार वीरगंज महानगरपालिका वडा नं. १ मा घरदैलो कार्यक्रमसँगै अगुवा कार्यकर्ता भेला आयोजना गरेका हुन् ।
घरदैलो अभियानका क्रममा टेमानीले ज्येष्ठ नागरिक, महिला, युवा तथा व्यवसायीहरूसँग प्रत्यक्ष संवाद गर्दै उनीहरूका दैनिक जीवनसँग जोडिएका समस्या र अपेक्षा सुने । आयोजित अगुवा भेलामा स्थानीय बुद्धिजीवी, समाजसेवी, व्यवसायी तथा टोल विकास समितिका प्रतिनिधिहरूको उल्लेख्य उपस्थिति रहेको थियो । कार्यक्रममा उनले आफू केवल मत माग्न नभई जनताका गुनासा बुझेर समाधानका लागि स्पष्ट प्रतिबद्धता जनाउन आएको बताए ।
स्थानीय बासिन्दाले सबैभन्दा बढी उठाएको मुद्दा खानेपानीको अभाव थियो। नियमित तथा स्वच्छ पानी नपाउने, चापाकल र धारामा पानी नआउने तथा गुणस्तर कमजोर हुँदा स्वास्थ्यमा असर परेको गुनासो गरिएको थियो । यसबारे टेमानीले संघीय तहबाट पहल गरी दीर्घकालीन खानेपानी आयोजना अघि बढाउने प्रतिबद्धता व्यक्त गरे ।
शिक्षा क्षेत्रको अवस्था पनि सन्तोषजनक नभएको अभिभावकहरूको भनाइ थियो । सामुदायिक विद्यालयमा भौतिक पूर्वाधारको कमी, शिक्षक दरबन्दी अभाव र गुणस्तरीय शिक्षाको समस्या रहेको उनीहरूले बताएका छन् । यसप्रति टेमानीले विद्यालय स्तरोन्नति, प्राविधिक शिक्षा विस्तार तथा युवालाई रोजगारीमुखी सीप प्रदान गर्ने कार्यक्रम ल्याउने योजना रहेको बताए ।
स्वास्थ्य सेवा पहुँच र गुणस्तरसमेत स्थानीय सरोकारको विषय बनेको छ । सामान्य उपचारका लागि टाढा जानुपर्ने बाध्यता, औषधिको अभाव र स्वास्थ्यकर्मी कमीबारे गुनासा उठेका छन् । टेमानीले वडास्तरमै प्राथमिक स्वास्थ्य सेवा प्रभावकारी बनाउने र सरसफाइ अभियानलाई सुदृढ गर्ने आश्वासन दिए ।
यस्तै, वर्षायाममा देखिने बाढी तथा पानी जम्ने समस्या पनि वडा नम्बर १ का बासिन्दाको चिन्ताको केन्द्रमा छ । कमजोर नाला र ढल निकास प्रणालीका कारण सामान्य वर्षामै सडक र घरभित्र पानी पस्ने अवस्था रहेको स्थानीयले बताएका छन् । यस विषयमा टेमानीले वैज्ञानिक ढंगले ढल निकास प्रणाली निर्माण र सडक पूर्वाधार सुदृढीकरणका लागि विशेष योजना ल्याउने प्रतिबद्धता जनाए ।
अगुवा भेलालाई सम्बोधन गर्दै टेमानीले विकास नारामा सीमित नभई व्यवहारमा देखिनुपर्ने धारणा राखे । ‘जनताको घरदैलोमा पुगेर सुनेका समस्या नै मेरा एजेन्डा हुन्,’ उनले भने, ‘खानेपानी, शिक्षा, स्वास्थ्य, सरसफाइ र ढल निकासका सवालमा संघीय संसद्मा प्रभावकारी आवाज उठाउनेछु ।’ उनले पारदर्शी, जवाफदेही र जनमुखी राजनीतिक अभ्यासलाई आफ्नो मुख्य प्राथमिकता बनाउने प्रतिबद्धता पनि व्यक्त गरे । 
प्रतिक्रिया दिनुहोस् !