वीरगंज (पर्सा), ८ फागुन । फागुन २१ गते हुने प्रतिनिधिसभा सदस्य निर्वाचन नजिकिँदै गर्दा पर्सा निर्वाचन क्षेत्र नम्बर–१ का उम्मेदवार अजय चौरसिया ले आफ्नो घरदैलो अभियानलाई तीव्रता दिएका छन् । नेपाल कम्युनिष्ट पार्टी (नेकपा) का उम्मेदवार चौरसियाले शुक्रबार वीरगञ्ज महानगरपालिका–श्रीपुर वडा नम्बर ११ मा घरदैलो कार्यक्रम सम्पन्न गर्दै मतदातासँग प्रत्यक्ष संवाद गरे ।
कार्यक्रमका क्रममा उनले स्थानीय मतदातासँग संवाद गर्दै पर्सा क्षेत्र मात्र नभई समग्र मुलुकको विकास र समृद्धिका लागि इमानदार, जवाफदेही र जिम्मेवार नेतृत्व चयन गर्न आग्रह गरे । चौरसियाले नेकपा प्रारम्भदेखि नै जनताका समस्या र मुद्दालाई प्राथमिकतामा राख्दै काम गर्दै आएको उल्लेख गर्दै आगामी दिनमा पनि जनहितलाई केन्द्रमा राखेर सेवा गर्ने प्रतिबद्धता व्यक्त गरे ।
देशमा व्याप्त भ्रष्टाचार, कुशासन र बेथितिलाई अन्त्य गर्न शिक्षित, जानकार र जवाफदेही नेतृत्व आवश्यक रहेको उनको भनाइ थियो । उनले भने, ‘देश डुब्नुको कारण पैसा होइन, हिसाब नबुझ्ने नेतृत्व हो । आम जनताले तिरेको करबाट बनेको प्रत्येक पैसा जनताकै हितमा खर्च हुनुपर्छ र त्यसको स्पष्ट हिसाब हुनु आवश्यक छ ।’
चौरसियाले निर्वाचन क्षेत्रमा अनुभव र दक्षता भएका नेताको आवश्यकता औंल्याउँदै, यसअघि निर्वाचित प्रतिनिधिहरूको कामको मूल्याङ्कन गरी यस पटक क्षेत्रको भविष्य, समृद्धि र विकासलाई ध्यानमा राखेर मतदान गर्न मतदातालाई सुझाव दिए । उनले आगामी निर्वाचनमा नेकपाको ‘तारा’ छापमा मतदान गर्न अपिल गर्दै पारदर्शी, जवाफदेही र विकासमुखी नेतृत्वका लागि आफूलाई अवसर दिन आग्रह गरे ।
घरदैलो कार्यक्रममा नेकपाका केन्द्रीय सदस्य बालगोपाल थापा, शेखचान्द तारा, बाबुराम कौशिक, रामदरश कुशवाहा लगायत स्थानीय नेता तथा कार्यकर्ताको उल्लेखनीय उपस्थितिले कार्यक्रमलाई उत्साहपूर्ण बनाएको थियो । चौरसियाको घरदैलो अभियानले पर्सा–१ मा मतदातासँग प्रत्यक्ष संवादको माध्यमबाट भरोसा निर्माण गरेको र आगामी निर्वाचनमा नेकपाको मत बढाउने रणनीतिक भूमिका खेलेको बताइन्छ । 
प्रतिक्रिया दिनुहोस् !