वीरगंज (पर्सा), ६ फागुन । पर्सा जिल्ला, सखुवा प्रसौनी गाउँपालिका वडा नम्बर ३ अन्तर्गत कटैया र गुलवरिया क्षेत्रमा प्रतिनिधिसभा निर्वाचन क्षेत्र नम्बर–३ का उम्मेदवार रुपेश पाण्डेले घरदैलो कार्यक्रम सम्पन्न गरेका छन् । कार्यक्रमका क्रममा उनले मतदातासँग प्रत्यक्ष संवाद गर्दै आफ्नो प्रतिबद्धता र क्षेत्रीय विकास योजनाहरू प्रस्तुत गरे ।
पाण्डेले आफू अन्य उम्मेदवारभन्दा भिन्न, जनताको सेवा र हितमा समर्पित रहेको उल्लेख गर्दै विजयी भएपछि मात्र विकासका कामहरू पूर्ण गर्ने अठोट व्यक्त गरे । उनले मतदातालाई झुटो आश्वासनमा नपर्न सचेत गराउँदै आफ्नो अभियान स्वच्छ र पारदर्शी रहेको दाबी गरे । ‘विजयी भएपछी म स्पष्ट भिजन र योजनासहित जनताको सेवा गर्ने अवसर दिनेछु,’ पाण्डेले भने ।
उम्मेदवारले मतदातासँग आफ्नो विश्वास र जिम्मेवारीको वाचा दोहोर्याउँदै भने कि क्षेत्र नम्बर–३ का नागरिकहरूले उनलाई मतदान गरेर विजयी बनाउने पूर्ण विश्वास राखेका छन् । उनले विकास, पूर्वाधार, शिक्षा, स्वास्थ्य र रोजगारी सिर्जनालाई आफ्नो प्राथमिकतामा राख्ने बताए ।
घरदैलो कार्यक्रममा पूर्वमन्त्री तथा एमाले नेता प्रमोद जैसवाल, मन्जुर आलम, फरमान मियाँ, सुजित गिरी, सन्तोष साह लगायत पार्टीका अन्य नेता तथा कार्यकर्ताहरूको उल्लेखनीय उपस्थिति रहेको थियो । सहभागीहरूले पाण्डेयको नेतृत्व क्षमता र जनप्रिय दृष्टिकोणप्रति उत्साहपूर्वक समर्थन जनाए ।
कार्यक्रमका क्रममा स्थानीय बासिन्दाले सडक, स्वास्थ्य सेवा, शिक्षा र कृषि विकासजस्ता विषयमा प्रश्न उठाए । प्रत्युत्तरमा पाण्डेले ती समस्याहरूलाई प्राथमिकताका साथ सम्बोधन गर्ने र आगामी दिनमा घरदैलो कार्यक्रममार्फत निरन्तर संवाद जारी राख्ने प्रतिबद्धता व्यक्त गरे । निर्वाचन नजिकिँदै गर्दा पर्सा–३ मा उम्मेदवारहरूको घरदैलो, भेटघाट र जनसम्पर्क कार्यक्रम तीव्र बनिरहेका छन् । यस क्रममा पाण्डेको कार्यक्रमले जनतासँगको प्रत्यक्ष सम्पर्क र विश्वासलाई मजबुत बनाएको विश्लेषकहरूले बताएका छन् ।
प्रतिक्रिया दिनुहोस् !