वीरगंज (पर्सा), ५ फागुन । पर्सा क्षेत्र नं. २ मा प्रतिनिधिसभा सदस्यका उम्मेदवार अशोक टेमानीले बहुदरमाई नगरपालिका–४ अन्तर्गत डौकैला–बहुवरी चौक क्षेत्रमा घरदैलो अभियान सञ्चालन गर्दै मतदातासँग प्रत्यक्ष संवाद गरेका छन् । जनता समाजवादी पार्टी (जसपा) का तर्फबाट उम्मेदवारी दिएका टेमानीले टोल–टोल पुगेर स्थानीयका गुनासा सुनेका हुन् ।
घरदैलो क्रममा ज्येष्ठ नागरिक, महिला, युवा तथा कृषकसँग छलफल गर्दै उनले गाउँलेले भोगिरहेका दैनन्दिन समस्याबारे जानकारी लिए । स्थानीयले स्वच्छ खानेपानीको अभाव, विद्यालयमा पूर्वाधार र गुणस्तरीय शिक्षाको कमी, शिक्षक अभाव तथा स्वास्थ्य चौकीको कमजोर सेवाका विषय उठाएका थिए ।
कृषकहरूले सिँचाइ सुविधा नपुग्नु, मल–बीउ आपूर्तिमा ढिलाइ हुनु र उत्पादनको उचित बजार नपाउनु जस्ता समस्याले खेतीपाती प्रभावित भएको बताएका थिए । ग्रामीण जीवनस्तर उकास्न आधारभूत सेवामा सुधार अपरिहार्य रहेको उनीहरूको जोड थियो ।
स्थानीयका कुरा सुनेपछि टेमानीले जनताको समस्या आफ्नै सरोकार भएको उल्लेख गर्दै योजनाबद्ध ढंगले समाधानतर्फ अघि बढ्ने प्रतिबद्धता जनाए । ‘म पदका लागि होइन, परिणामका लागि राजनीतिमा आएको हुँ । खानेपानी, शिक्षा, स्वास्थ्य र कृषि सुधार बिना समग्र विकास सम्भव छैन,’ उनले भने ।
उनले स्थानीय पूर्वाधार सुदृढीकरण, रोजगारी सिर्जना, कृषि आधुनिकीकरण तथा गुणस्तरीय शिक्षा–स्वास्थ्य सेवाको विस्तारलाई प्राथमिकतामा राख्ने बताए । कार्यक्रममा सहभागी स्थानीयले विकासमुखी नेतृत्वलाई साथ दिने विश्वास व्यक्त गरेका थिए ।
यस अभियानसँगै टेमानीले क्षेत्र नं. २ का विभिन्न गाउँ–टोलमा चुनावी गतिविधि तीव्र बनाएका छन् । जनतासँग प्रत्यक्ष संवादमार्फत सम्बन्ध सुदृढ गर्दै उनले आफ्नो अभियानलाई स्थानीय आवश्यकता र विकासकेन्द्रित एजेन्डामा केन्द्रित गरेका छन् । 
प्रतिक्रिया दिनुहोस् !