वीरगंज (पर्सा), ५ फागुन । पर्सा निर्वाचन क्षेत्र नं. २ मा प्रतिनिधिसभा सदस्यका उम्मेदवार सुशील कुमार कानुले पर्सागढी नगरपालिका–३ बढनिहारमा घरदैलो अभियान सञ्चालन गरेका छन् । राष्ट्रिय स्वतन्त्र पार्टी (रास्वपा) का तर्फबाट उम्मेदवारी दिएका कानुले मतदातासँग प्रत्यक्ष भेटघाट गर्दै घण्टी चुनाव चिन्हमा समर्थन गर्न अपिल गरे ।
घरदैलोका क्रममा स्थानीयले अस्पताल अभाव, खेलकुद पूर्वाधारको कमी तथा कृषकले भोग्दै आएको मल र सिँचाइ समस्याबारे गुनासो राखेका थिए । ती विषयलाई सम्बोधन गर्ने प्रतिबद्धता व्यक्त गर्दै कानुले कृषि नै यस क्षेत्रको मुख्य आधार भएकाले किसानलाई समयमै मल र पानी उपलब्ध गराउनु अत्यावश्यक रहेको बताए । निर्वाचित भए यी मुद्दालाई प्राथमिकतामा राखेर समाधानतर्फ ठोस पहल गर्ने उनको भनाइ थियो ।
युवालाई लक्षित कार्यक्रमअन्तर्गत स्थानीय तहमै पशुपालनसम्बन्धी प्राविधिक तालिम सञ्चालन गर्ने, स्वरोजगारका अवसर विस्तार गर्ने तथा रोजगारी सिर्जनामा जोड दिने योजना पनि उनले सार्वजनिक गरे । वैदेशिक रोजगारीमा जानुपर्ने बाध्यता घटाएर युवालाई आफ्नै गाउँ–ठाउँमा सम्भावना निर्माण गर्न सहयोग पुर्याउने उद्देश्य रहेको उनले स्पष्ट पारे ।
कानुले प्रभावकारी अस्पताल व्यवस्थापन, आधारभूत स्वास्थ्य सेवामा सहज पहुँच र शिक्षाको गुणस्तर अभिवृद्धिलाई पार्टीको मुख्य एजेन्डाका रूपमा अघि सारे । ‘जनताको आधारभूत आवश्यकता सुनिश्चित नगरी विकासको चर्चा गर्नु सार्थक हुँदैन,’ उनले भने ।
घरदैलो कार्यक्रममा बढनिहारका ज्येष्ठ नागरिक, महिला, युवा तथा कृषक समुदायको उल्लेख्य सहभागिता देखिएको थियो । सहभागीहरूले परिवर्तनको पक्षमा समर्थन जनाउँदै यसपटकको मतले सकारात्मक रूपान्तरण ल्याउने विश्वास व्यक्त गरेका छन् । कार्यक्रमले बढनिहार क्षेत्रमा रास्वपाप्रति बढ्दो चासो र चुनावी गतिविधि थप सक्रिय बन्दै गएको संकेत गरेको छ ।
प्रतिक्रिया दिनुहोस् !