कलैया (बारा), १२ मंसिर । माथिको तस्बिरमा देखिएको लामबद्ध लाइन र भिड कुनै मन्दिर वा मेलाको होइन । यो भिड जिल्ला प्रशासन कार्यालय बारा कलैयाको हो । यस्तो भिड जिल्ला प्रशासन कार्यालयमा दिनहुँ हुने गर्दछ । यदि तपाईँ कुनै काम लिएर जिल्ला प्रशासन कार्यालय बारामा जानुभयो भने तपाईँले सहजै सेवा पाउने स्थिति भने छैन । घण्टौँसम्म लाइन बस्तु पर्ने वा काम नभएर रित्तै हात फर्कनु पर्ने पनि हुन सक्दछ । जिल्ला प्रशासन कार्यालयले नयाँ नागरिकता, प्रतिलिपि नागरिकता, राहदानी, राष्ट्रिय परिचयपत्र जस्ता सेवाहरू दिने गरेको छ । अरू सेवा भन्दा पनि नयाँ नागरिकता र प्रतिलिपि नागरिकता वितरणमा सबैभन्दा बढी समस्या देखिएको छ ।
कार्यालयमा सेवा लिन आउनेहरूको अत्यधिक चाँप हुनु र कार्यालयमा पर्याप्त कर्मचारीहरू नहुँदा सेवा प्रवाहमा समस्या बढ्दै गएपछि जिल्ला प्रशासन कार्यालय बारा बेथितिको चाङ्ग बनेको छ । जिल्ला प्रशासन कार्यालय बाराअन्तर्गत अधिकृत स्तरका मात्रै ४ जना कर्मचारी नहुँदा नागरिकता वितरणमा सबैभन्दा बढी समस्या देखिएको कार्यालयले जनाएको छ । लामो समयदेखि कार्यालयमा प्रशासकीय अधिकृतहरू नहुँदा सेवाग्राहीहरूलाई सहज रूपमा सेवा दिन नसकेको प्रशासन कार्यालयको पनि स्वीकारोक्ति रहेको छ । कार्यालयमा सेवाग्राहीहरूले सहज रूपमा सेवा नपाउनु र बढी भिडभाड हुनको कारण मुख्यतः कर्मचारी अभाव नै रहेको प्रशासन कार्यालयको नेतृत्व गरिरहेका प्रमुख जिल्ला अधिकारी नवराज सापकोटाको भनाई छ । 
जिल्ला प्रशासन कार्यालयमा मात्र होइन यस अन्तर्गत रहेका अन्य कार्यालयहरू इलाका प्रशासन कार्यालय कोल्हवी, इलाका प्रशासन कार्यालय सिमरा र इलाका प्रशासन कार्यालय सिम्रौनगढका गरी र ४ जना प्रशासकीय अधिकृत रवाना लिएदेखि अधिकृतबाट हुने सबै काम ठप्प भएको छ । नागरिकता लगायतका सेवाहरू सहज रूपमा सेवा दिन सिमरा, कोल्हवी र सिम्रौनगढमा पनि इलाका प्रशासन कार्यालय सञ्चालनमा छ । तर कोल्हवी र सिम्रौनगढमा अधिकृत नहुँदा सेवाग्राहीहरू लामो दुरी पार्दै कलैया जिल्ला प्रशासन कार्यालय जाने गरेका छन् । अधिकृत नै नहुँदा इलाका प्रशासनको काम ठप्प बने पछि कलैयास्थित जिल्ला प्रशासन कार्यालयमा सेवा लिनेहरूको चाँप बढेको छ । इलाका प्रशासन कार्यालय ठप्प भएपछि दैनिक जसो कोल्हवी र सिम्रौनगढका सयौँ सेवाग्राहीहरू आएपछि अझ कार्यालयमा चाँप बढेको प्रमुख जिल्ला अधिकारी सापकोटाले बताए ।
छोटो समयको जिम्मेवारी लिएर गएका कर्मचारी समयावधि भित्रै रवाना लिएर गएपछि सेवाग्राही मारमा परेको सापकोटाको भनाई छ । दुई जना अधिकृतले गर्नुपर्ने काम अहिले प्रशासकीय अधिकृत अनिता कुमारी राजलबटले मात्र गरेर भए पनि काम चलाऊ रूपमा सेवाग्राहीहरूलाई सेवा दिइरहेको प्रमुख जिल्ला अधिकारी सापकोटाको गुनासो छ । इलाका प्रशासन कार्यालयहरू रहेका प्रशासकीय अधिकृतहरूको सरुवा भएपछि काम ठप्प भएको कुरा स्वीकार गर्दै प्रमुख जिल्ला अधिकारी सापकोटाले उक्त समस्याको बारेमा आफूले बारम्बार सम्बन्धित माथिल्लो निकायमा घचघच्याइरहेको जानकारी दिए । बारामा वंशज,जन्मसिद्ध जस्ता नयाँ नागरिकता र प्रतिलिपि लिने नागरिकहरूको चाप बढेपछि अन्यौलता सिर्जना भएको प्रजिअ सापकोटाको भनाई छ । 
जिल्ला प्रशासन कार्यालयमा बिहान ८ बजेदेखि नै लाइनमा बसेर पनि काम हुन नसकेको आइतबार कार्यालय परिसरमा भेटिएका सेवाग्राही राम पासवानले दुःखेसो व्यक्त गरे । जिल्ला प्रशासन कार्यालयमा सेवा लिन आउँदा एक दिनको काममा हप्तौँ लाग्ने गरेको र शाखा अधिकृत नहुँदा काम नभई घर फर्किने अवस्था रहेको अर्का एक सेवाग्राहीले बताए । प्रशासन कार्यालयमा सबैभन्दा बढी प्रतिलिपि लिन आउने सेवाग्राहीले बढी दुःख पाउने गरेका छन् । प्रतिलिपि नागरिकता लिन हप्तादेखि महिनौँसम्म लाग्ने गरेको एक सेवाग्राहीले गुनासो सुनाए । साभार : आईएनएस/स्वतन्त्र समाचार सेवा
प्रतिक्रिया दिनुहोस् !