• हरिशंकर शर्मा
वीरगंज (पर्सा), २ मंसिर । सरकारी स्वामित्वमा रहेको सवारी साधनको दुरुपयोग गर्ने कार्य रोकिएको छैन । विगतदेखि पटक पटक सरकारी सवारीको दुरुपयोगबारे समाचारहरु प्रकाशन हुँदै आएको एवं सामाजिक सञ्जालमा विरोध हुँदापनि सरकारी गाडी दुरुपयोगको कार्य रोकिएको छैन । सरकारी कार्यालयको कामकाज भन्दा पनि हाकिम एवं कर्मचारीका श्रीमतीहरुले आफ्नो निजी कामको लागि सरकारी गाडीको दुरुपयोग गर्ने कार्य बढ्दै गएको हो ।
जनताको सेवा गर्ने क्रममा पालिका तथा सरकारी कार्यालयको कामको लागि आवत जावत गर्न सरकारले उपलब्ध गराएको सरकारी नम्बर प्लेटको गाडी पालिकाका जनप्रतिनिधिका आफन्त, श्रीमती तथा कर्मचारीको श्रीमतीहरु चढेर घरायसी सामान किनमेल गर्न रक्सौल पुग्ने गरेको पाइएको हो । घरायसी सामान किनमेल गर्न सरकारी गाडी भारतीय सिमावर्ती सहर रक्सौल स्थित थुप्रै हेर्न सकिन्छ । खास गरेर सार्वजनिक विदाको दिन सरकारी गाडी कार्यालय प्रमुख तथा जनप्रतिनिधिका आफन्तले किनमेलको लागि भारतीय सिमावर्ती सहर रक्सौल लगेको पाइएको छ । स्थलगत अनुगमनको क्रममा भारतको रक्सौल स्थित भारतीय आयल कर्पोरेशनको दक्षिणपट्टि रहेको सवारी पार्किङ्गमा थुप्रै संख्यामा नेपाल सरकारले उपलब्ध गराएको सवारी पार्किङ्ग गरेको अवस्थामा देख्न सकिन्छ ।
अहिले तिहार तथा छठ पर्वको बेला घरासयी सामान किन्न कर्मचारी एवं जनप्रतिनिधिका श्रीमतीहरु सरकारी गाडी चढेर रक्सौल बजार पुग्ने गरेको छ्यापछ्याप्ती देख्न सकिन्छ । शुक्रबार साँझ रक्सौल बजारको पार्किङ्ग स्थलमा ‘प्रदेश २-०३-००१ झ ०००५, बा. १ झ ७६८९’ नम्बरको सरकारी गाडी पार्किङ्ग स्थलमा पार्क गरि राखिएको थियो । दुबै गाडीमा महिला सवार भई घरायसी सामान किनमेल गर्न रक्सौल बजार पुगेका थिए । सरकारी गाडी लिएर आएका सवारी चालकसँग बुझ्दा आफूले केही नगरेको, जसले गाडी ल्याएको छ उसैसँग गएर बुझ्न भनि त्यहाँबाट फरार भएका थिए ।
यो त उदाहारणको पात्र मात्रै हुन्, पर्सा जिल्लामा रहेका १४ वटा पालिकाहरु सिमावर्ती क्षेत्रमा पर्ने अधिकाँश पालिकाको गाडी भारतीय सिमावर्ती सहरमा पुग्ने गरेको पाइन्छ । यहाँ स्थित सरकारी कार्यालयका कर्मचारीका श्रीमतीहरु पनि सरकारी गाडी चढेर घरायसी सामान किन्न रक्सौल बजारसम्म पुग्ने गरेको पाइन्छ । सरकारी नम्बर प्लेटको मोटरसाइकलमा त तस्करहरुले ल्याउने सामान भन्दा पनि बढि सामान लोड गरेर खुलेयाम मुख्य भन्सार हुँदै ल्याउने गरेको सहजै देख्न सकिन्छ ।
यसरी सरकारी नम्बरको गाडी लिएर सिमावर्ती सहरमा सामान किनमेल गर्न जाँदा कोही कसैले रोकटोक समेत गर्ने गरेको छैन । कार्यालयको काम गर्नका निम्ति मात्रै सरकारी गाडी प्रयोग गर्न पाउने प्रावधान रहेको अवस्थामा यहाँका कर्मचारीहरु खुलेयाम आफ्नो घरायसी सामान किनमेल गर्न रक्सौल आउजाउ गर्ने गरेका छन् । सरकारी गाडीमा बोकी भारतीय सिमावर्ती सहरबाट सामान ल्याउँदा भन्सार स्थित सुरक्षाकर्मीले रोकटोक नगर्ने, जति सामान भएपनि चेकजाँच नहुने, त्यसमा पनि आफ्नो निजी खर्च पनि नहुने कारणले गर्दा पनि जनप्रतिनिधि तथा कर्मचारी पत्निहरु सरकारी गाडीको दुरुपयोग गर्ने गरेको पाइन्छ ।
सम्बन्धित नियामक निकाय जिल्ला प्रशासन कार्यालयको कमजोरीको कारण पनि जिल्लाका पालिका लगायत सरकारी कार्यालयहरुको गाडीको खुलेयाम दुरुपयोग हुने गरेको छ । यसो पनि सार्वजनिक विदाको दिन सरकारी गाडी चलाउन नपाइने अवस्थामा नियम कानूनलाई लत्याउँदै सरकारी निकायका कर्मचारी श्रीमती एवं जनप्रतिनिधिका श्रीमतीहरुले सरकारी गाडीको दुरुपयोग गर्ने गरेका छन् । स्थानीय निकायका जनप्रतिनिधि एवं कर्मचारी श्रीमतीहरुले सरकारी गाडीको दुरुपयोग गरेको यो पहिलो घटना पनि होइन, पटक पटक यो विषयको उठान गरिएको छ तर सम्बन्धित निकायको लाचारीपनको कारण सरकारी गाडी दुरुपयोगमा कमि हुनुको साथै झन बढ्दै गएको पाइन्छ ।
सामान्यता सरकारी विदामा सरकारी गाडी चलाउन पाइँदैन, तर कुनै यस्तो कार्यालय हुन्छ, फिल्डमा जानुपर्ने हुन्छ, शान्ति सुरक्षा कायम गर्न जानुपर्ने हुन्छ, त्यस्तो अवस्थामा जिल्ला प्रशासन कार्याल्यबाट सवारी पास जारी गरिन्छ र त्यसले मात्रै गाडी चलाउन पाउँछ तर यसरी अनुमति नलिई सरकारी विदाको दिन चलाउने गाडीलाई जिल्ला प्रशासन कार्यालयले रोक्न सकेको छैन ।
प्रतिक्रिया दिनुहोस् !