कलैया (बारा), १५ कात्तिक । बाराको सदरमुकाम कलैयामा गत १३ गते सोमबार दिनदहाडै गोली हानिएको घटनामा ‘प्रेम सम्बन्ध’ रहेको बारा प्रहरीले पुष्टि गरेको छ । कलैया उपमहानगरपालिका वडा नं. ६ मदरसा टोल स्थित सोमबार दिउँसो करिब १ बजेको समयमा बाल एकता बोर्डिङ्ग स्कुलका संचालक एवं प्रधानाध्यापक ३५ वर्षीय गुड्डु भनिने रुपेश सर्राफलाई अज्ञात समूहले गोली हानी हत्या गरेको थियो । मोटर साइकलमा आएका दुई जना अज्ञात व्यक्तिले तीन राउण्ड गोली हानेका थिए । गोली लागेर घाइते भएका सर्राफलाई कलैया प्रादेशिक अस्पताल लगिएको थियो । त्यहाँ उपचार हुन नसकेपछि वीरगंज स्थित वयोधा अस्पतालमा लगिएको थियो भने बयोधा अस्पतालले उनलाई मृत घोषणा गरेको थियो ।
यस घटनाको मुख्य कारण नै ‘प्रेम सम्बन्ध’ रहेको बारा प्रहरीको भनाई छ । दोहोरो प्रेममा परेकी सर्राफकै स्कुलमा लेखापालमा कार्यरत पूर्व कर्मचारी कलैया – ६ निवासी २२ वर्षीय राधा गुप्ताकै कारण प्रधानाध्यापक रुपेश सर्राफको गोली हानी हत्या गरिएको प्रहरीले निष्कर्ष निकालेको छ । बुधबार बारा प्रहरीले पत्रकार सम्मेलन गर्दै हत्याको मुख्य कारण नै ‘अवैध सम्बन्ध’ रहेको बाराका प्रहरी उपरीक्षक सुरेश काफ्लेले जानकारी दिए । उनका अनुसार मृतक रुपेश सर्राफ विवाहित रहेपनि उनी र पूर्व कर्मचारी राधा गुप्ताबीच प्रेम सम्बन्ध रहेको र राधा गुप्ता भारत निवासी मनोज गुप्ताको प्रेम सम्बन्धमा रहेका थिए । भारतीय प्रेमी मनोज गुप्ता पनि विवाहित छन् । दोहोरो प्रेममा परेकी राधाले रुपेश सर्राफसँगको सम्बन्धमा खटपट भएपछि राधा गुप्ता र उनका अर्का भारत निवासी प्रेमी मनोज गुप्ताले मिलेर हत्या गराएको प्रहरी उपरीक्षक काफ्लेले जानकारी दिए ।
राधाकै योजनामा प्रेमी मनोजले भारतबाट सूटरहरु बोलाएर सोमबार दिउँसो रुपेशको हत्या गराएको प्रहरी उपरीक्षक काफलले बताए । रुपेशलाई गोली हान्ने बखत भारतका चार जना सुटर र मनोज आफैंपनि संलग्न थिए । दुई वटा मोटरसाइकलमा सवार भई आएका भारत बिहारको मोतिहारी जिल्ला दर्पा थाना १ सुकलहीया निवासी २५ बर्षीय सुजित कुमार सिंह, सोही ठाउँ निवासी चञ्चल पाण्डे, २२ बर्षीय मनिष सहनी र २० बर्षीय कामेश्वर सहनीले सर्राफलाई गोली हानेका थिए । सर्राफको हत्यामा संलग्न मुख्य योजनाकार राधासहित पाँच जनालाई पक्राउ गरि सार्वजनिक गरेको छ । मुख्य योजनाकार कलैया ६ मदर्शा टोलकी २२ बर्षीय राधा गुप्ता सहित सोही टोल निवासी ३४ बर्षीय जमिल अख्तर, कलैया – ९ रामपुर निवासी २६ बर्षीय रियाज अन्सारी, भारत बिहार घोडासहन जगीराकोटी निवासी २३ बर्षीय चन्दन कुमार र छिमेकी २३ बर्षीय अभिनव कुमार राजपुत रहेका छन् । तिनीहरुमध्ये राधा मुख्य योजनाकार छन् भने जमिल र रियाज सहयोगी तथा चन्दन र अभिनव सुटर ग्याङको सदस्य रहेको प्रहरी उपरीक्षक काफ्लेले जानकारी दिए । सर्राफललाई गोली हान्ने चारै जना भारतीय सुटर र राधाका प्रेमी मनोज गुप्ता फरार छन् । 
प्रहरी उपरीक्षक काफ्लेका अनुसार राधा भारतीय नागरिक मनोजसँग तीन वर्षदेखि प्रेम सम्बन्धमा थिइन् । २०७९ साल बैशाखदेखि राधा रुपेशको स्कुलमा लेखापाल पदमा काम गर्न थालेपछि उनी रुपेशसँगपनि नजिकिएकी थिइन् । राधा रुपेशसँग नजिकिएको मनोजले थाहा पाएपछि मनोजले राधालाई स्कुल छाड्न दबाब दिदै आएको र राधासँग टाढा रहन रुपेशलाई पटक पटक धम्की समेत दिदै आएका थिए । राधाकै विषयलाई लिएर रुपेश र मनोजबीच पटक पटक विवाद पनि हुँदै आएको थियो । तीन महिना अघि साउन महिनामा पनि रुपेशको हत्या गर्ने प्रयास भएको थियो तर त्यस बखत रुपेशले त्यो घटनालाई दबाएका थिए । यति हुँदापनि रुपेश र राधाबीचको घनिष्टता कम नभएपछि मनोज रुपेशको विद्यालयमै पुगेर राधालाई कुटपिट समेत गरेका थिए त्यस पश्चात राधाले स्कुल छाडेकी थिइन् । स्कुल छाडेपनि रुपेशले राधासँगको सम्बन्ध नतोडेपछि राधाकै योजनामा भारतीय प्रेमी मनोजले भारतबाट सुटरहरु बोलाएर रुपेशको हत्या गराएको अनुसन्धानको क्रममा खुलेको प्रहरी उपरीक्षक काफ्लेले जानकारी दिए ।
अपराधीलाई पक्राउ गर्न बारा प्रहरी असफल
बारा प्रहरीले यस घटनामा संलग्न अपराधीहरुलाई पक्राउ गर्न असफल भएको छ । पत्रकार सम्मेलनमा हत्याको मुख्य योजनाकार र उनका सहयोगीहरुलाई सार्वजनिक गरिएपनि मुख्य अपराधीहरुभने अहिलेसम्म फरार छन् । प्रहरीले यस घटनामा सफल भएको दाबी गरि रहँदा पनि असफल रहेको देखिन्छ । पत्रकार सम्मेलनमा सञ्चारकर्मीहरुले सोधेको प्रश्नको जवाफ समेत दिन नसकेपछि प्रहरी उपरीक्षक काफ्ले हिँडेका थिए । अनुसन्धानको क्रममा तयार पारिएको फाइललाई सरासर पढेर सुनाई पत्रकारहरुको प्रश्नको जवाफ नै नदिई उठेर हिँडेका थिए । घटनाको अपराधी ५ जनामध्ये कोही पक्राउ पर्न नसकेको कारण बाराबासीमा त्रास अहिलेपनि यथावत नै छ ।
मुख्य योजनाकार एवं सहयोगीहरुलाई सार्वजनिक गरेर यो घटनाको टुँगो लगाउन खोजेपछि सुटरहरु पक्राउ पर्न नसक्नुले कलैयामा सुरक्षा चुनौति अहिलेपनि कायमै रहेको देखिन्छ । गोली काण्डको सुटर यो भन्दा अघि पनि गोली हानी हत्या गरेका थिए । उनीहरु प्रहरीको मोस्ट वान्टेड सूचीमा रहेका अपराधीहरु हुन् । तिनीहरुमाथि प्रहरीले निगरानी पनि गरि रहेको तर प्रहरीको निगरानीमा रहेका ति अपराधीहरु पुनः सदरमुकामको मुख्य बजारमा नै पुनः गोली हानेर फरार हुनले कलैयाको सुरक्षा व्यवस्थामाथि अझ चुनौति थपिएको छ । सुटरहरु पक्राउ पर्न नसकेको कारण यस्ता घटना पुनः दोहोरिन नसक्ने भन्ने अवस्था नरहेको जानकारहरुको बुझाई छ । घटनालाई सामसुम पार्नकै लागि हतार हतारमा पत्रकार सम्मेलन गर्नुले बारा प्रहरीको अनुसन्धानमाथि नै प्रश्न चिन्ह् खडा भएको छ ।
पत्रकार सम्मेलनमा सार्वजनिक गरिएका ५ जना अभियुक्तमध्ये रियाज अन्सारीका परिवारले बारा प्रहरीले यो घटनालाई टुँगो लगाउनको लागि निर्दोष व्यक्तिलाई फसाएको आरोप लगाएका थिए । जिल्ला प्रहरी कार्यालय बाराकै परिसरमा भेटिएका रियाज अन्सारीका परिवारजनले अभियुक्त बताइएका रियाजको यो घटनामा कुनै संलग्नता नरहेको दाबी गरेका हुन् । रुपेशलाई गोली लागेपछि त्यही रहेका रियाजले उनलाई अस्पताल लैजान सहयोग गरेको अवस्थामा अपराधीलाई पक्राउ गर्न नसकेका बारा प्रहरीले रियाजलाई नै यस घटनाको सहयोगीको रुपमा बताएर सार्वजनिक गरेको बताए । पत्रकार सम्मेलनमा पनि अभियुक्त भनिएकाहरुलाई सार्वजनिक पनि गरिएको थिएन् ।
प्रतिक्रिया दिनुहोस् !