वीरगंज (पर्सा), १३ कात्तिक । पर्सा प्रहरीले कान्छी श्रीमती हत्याको आरोपमा एकजनालाई पक्राउ गरेको छ । पक्राउ पर्नेमा वीरगंज महानगरपालिकाको वडा नं. १४ बहुअरी निवासी ४५ बर्षीय एजहारूल हक अन्सारी रहेका छन् । घरायसी विवादका कारण आफ्नै कान्छी श्रीमतीलाई कुटपिट गरि धारिलो चक्कुले छाती तथा पेटमा प्रहार गरि हत्या गरेको आरोपमा अन्सारीलाई पक्राउ गरिएको जिल्ला प्रहरी कार्यालय पर्साका प्रहरी नायब उपरीक्षक कुमार बिक्रम थापाले जानकारी दिए ।
उनका अनुसार एजहारुलहकले आफ्नै कान्छी श्रीमती २८ बर्षिय महिमा खातुनलाई कात्तिक ४ गते राति अन्दाजी ८ः३० बजेको समयमा घरायसी विवादका कारण कुटपिट गर्नुको साथै छुरा प्रहार गरि घाइते बनाएका थिए । गम्भिर घाईते महिमाको उपचारको क्रममा घटना भएको भोली पल्टै विहान १०ः३० बजे वीरगंज स्थित वीरगंज हेल्थ केयर अस्पतालमा मृत्यु भएको थियो । मृतकको शव पोष्टमार्टमा वीरगंज स्थित नारायणी अस्पतालमा गरिएको थियो । घटना भएकै दिन महिमाको हत्यामा संलग्न एजहारुलकी जेठी श्रीमती ३८ बर्षीय नुरजहान खातुनलाई प्रहरीले नियन्त्रणमा लिएको थियो तर छुरा प्रहार गर्ने श्रीमान एजहारुल फरार भएका थिए । एजहारुलाई प्रहरीले कात्तिक ६ गते नै पक्राउ गरेपनि ७ दिनपछि १३ गते (आज) सोमबार मात्र सार्वजनिक गरेको छ ।
प्रहरीका अनुसार घरायसी विवादका कारण ससुरा ६५ बर्षीय फजल करिम मियाँ, सासु आमा ६३ बर्षीय सरिफन खातुन र सौता वर्ष ३८ की नुरजहान खातुन समेतले मृतक महिमालाई कुटपिट गरेको र सोही क्रममा अभियुक्त एजहारूलहकले धारिलो हतियार छुरा प्रहार गरेको अनुसन्धानबाट खुलेको प्रहरीले जनाएको छ । अहिले पनि घटनामा संलग्न मृतकका ससुरा फजल र सासु आमा सरिफन फरार नै छन् । पक्राउ परेका अभियुक्तहरूलाई पर्सा जिल्ला अदालतबाट १२ दिनको म्याद थप गरी घटना सम्बन्धमा थप अनुसन्धान भइरहेको र अन्य अभियुक्तहरूको खोजी कार्य भरहेको जिल्ला प्रहरी कार्यालय पर्साले जनाएको छ ।
जेठी श्रीमतीसँग सन्तान नभएपछि इजहारुलले जिल्ला बारा कलैया उपमहानगरपालिकाको घुसुकपुरुवा निवासी मृतक महिमासँग विवाह गरेका थिए । महिमाको एउटा ३ बर्षीय छोरी र एक बर्षीय छोरा छन् । वीरगंजकै राधेमाई स्थित ब्युटीपार्लर संचालन गर्दै आएकी मृतक महिमा केही समय पहिला श्रीमान इजहारुल विरुद्ध अदालतमा अंशको मुद्दा दिएकी थिइन् । मुद्दा हाल विचाराधीन अवस्थामा रहेको उनका आफन्तजनले जनाएका छन् । 
प्रतिक्रिया दिनुहोस् !