कलैया (बारा), १३ कात्तिक । निजी तथा आवसीय विद्यालय अर्गनाइजेशन नेपाल (प्याब्सन) पर्साले बाल एकता इङ्लिस बोर्डिङ स्कूल कलैयाका प्रधानाध्यापक रूपेश सर्राफको गोली हानी हत्या गरिएको विरोधमा मंगलबार विद्यालय बन्दको आह्वान गरेको छ । प्रधानाध्यापक सर्राफको हत्याको शोक र विरोधमा कात्तिक १४ गते मंगलबार प्याब्सन अन्तर्गतका सम्पूणर् विद्यालयहरू बन्द रहने प्याब्सन पर्साका अध्यक्ष पुरन प्रधानले जानकारी दिए ।
प्याब्सन वीरगंज र पर्साले संयुक्त रुपमा प्रेस विज्ञप्ति जारी गर्दै बाराको सदरमुकाम कलैया उपमहानगरपालिका स्थित प्रधानाध्यापक रूपेश सर्राफको दिनदहाडै गोली हानी गरिएको हत्याको घटनाप्रति घोर भत्सर्ना समेत गरेको छ । जिल्लाको सदरमुकाममै दिनदहाडै सर्राफलाई गोली हानी हत्या हामीलाई गम्भिर बनाएको छ । ‘यस घटनाले शिक्षक विद्यार्थी लगायत कोही पनि सुरक्षित नरहेको तितो यथार्थलाई उजागार गरेको हाम्रो ठहर छ’ जारि विज्ञपतीमा उल्लेख गरिएको छ ।
साथै प्याब्सनले सर्राफको हत्यामा संलग्न दोषीलाई यथाशिघ्र पक्राउ गरी कानुनी दायरामा ल्याउन प्रहरी प्रशासनसँग जोडदार माग समेत गरेको छ । दोषीलाई पक्राउ गरी पीडितलाई न्याय दिलाउन कुनै ढिलासुस्ती भए थप चरणबद्ध आन्दोलनका कार्यक्रम सार्वजनिक गर्न बाध्य हुने व्यहोरा पनि जारि विज्ञप्ति उल्लेख गरिएको छ । यसैगरी एन प्याब्सन बाराले पनि मंगलबार बाराका सबै बिधालय बन्द गर्न आह्वान गरेको छ । प्रधानाध्यापक सर्राफको हत्या विरोधमा दोषी उपर कारवाहीको माग गर्दै विद्यालय बन्दको आह्वान गरिएको एन प्याब्सन बाराले जनाएको छ ।
प्रतिक्रिया दिनुहोस् !