वीरगंज (पर्सा), ५ कात्तिक । हिन्दु सनातन धर्मप्रतिको आस्था ! सनातन धर्मलाई संरक्षण गर्न एवं विश्वलाई नै सन्देश दिनको लागि एक महिला भक्तले एक हप्तादेखि जीउभरि जमरा उमारेकी छिन् । नवरात्रीको ९ दिनसम्म स्थिर भई एकत्रित रुपले एक हप्तादेखि सुतेर जीउभरि नै जमरा उमारेकी भारतको हरिद्वार निवासी महिलाको सनतान धर्मप्रतिको आस्थाले गाउँबासीलाई नै चकित तुल्याएको छ ।
हिन्दुहरुको महान ‘पर्व नवरात्री’ ! वडा दशैंको बेला मनाइने नवरात्री पर्वमा महिला तथा पुरुषले ९ दिनसम्म अन्न त्यागी दुर्गा भवानीको पुजापाठ गरि नवरात्री पर्वलाई मनाउने गरेका छन् । यस नवरात्री पर्वको बेला दुर्गाभवानीको मन्दिर भएको ठाउँमा ठूलठूला मेला पनि लाग्ने गर्छ भने गाउँगाउँमा पण्डाल बनाई नवरात्री पर्व मनाउने गरिएको छ । तर यस पटक एक महिलाले नवरात्री भन्दा तीन हप्ता अगाडिदेखि नै अन्न त्यागी घटस्थापनादेखि नवरात्रीसम्म आफ्नो जीउभरि जमरा उमारेकी छिन् ।
पर्साको वीरगंज महानगरपालिका वडा नं. २६ अठराहा स्थित एक महिला जीउभरि जमरा उमारेकी छिन् । भारतको प्रसिद्ध धार्मिक स्थल हरिद्वारकी एक महिला भक्तले घटस्थापनाको दिन जीउभरि जमरा रोपेर उमारेकी छिन् । विगत एक महिनादेखि ति महिला भक्तले अन्न त्यागेकी छिन् भने घटस्थापनाको दिन जीउभरि जमरा रोपेर एकत्रित रुपले सुतेकी छिन् । घटस्थापनाको दिनदेखि हालसम्म शौच समेत नगरेको स्थानीयहरुको भनाई छ । दिनको दुई चम्मा गँगाजल मात्रै पिएर कठोर पर्वलाई पुरा गरि रहेकी छिन् ।
सनातन धर्मलाई जोगाउन, धर्म एवं देवी देउताको शक्तिलाई दर्शाउनको लागि यो कार्य गरेको महिला भक्तजनको भनाई छ । धर्मको शक्तिले नै ३० दिनदेखि अन्न त्यागेपछि हालसम्म आफू स्वस्थ्य रहेको बताइन् । सनातन धर्ममा अहिलेपनि धेरै शक्ति छ, देवी देउतामा विश्वास गर्नुपर्यो भन्दै उनले जसरी यहाँ धर्म परिवर्तनको कार्य तिब्र गतिमा भईरहेको छ, त्यसलाई रोक्नको लागि यो कठोर तपस्या गरेको बताइन् । धर्मलाई जोगाउनु पर्छ, धर्म नै विज्ञान हो, विज्ञानसँग धर्म जोडिएको कारण धर्मलाई पनि संरक्षण गर्नु हामी सबैको दायित्व रहेको बताइन् ।
हिन्दुधर्मलाई संरक्षण एवं यहाँका नागरिकहरुलाई धर्मप्रतिको विश्वासलाई अझै कायम गराउनको लागि भारतबाट आएर माताले जीउभरि जमरा उमारेको स्थानीयहरुको भनाई छ । यो यस क्षेत्रभरि नै पहिलो पटक भएको उनीहरुको भनाई छ । दिनप्रतिदिन धर्म परिवर्तन गर्नेहरुको संख्या बढ्दै गएकोमा त्यसलाई रोक्न एवं धर्मप्रतिको आस्था र विश्वासले नै जीउनमा शान्ति, समृद्धि ल्याउने भएकोले धर्मलाई संरक्षण गर्नुपर्ने उनीहरुको भनाई छ । ति महिलाले गरेको कार्य यस जिल्लामा नै पहिलो पटक रहेको उनीहरुको भनाई छ ।
कठोर तपस्यामा लिन भएकी ति महिला भक्तको सेवामा एकजना पुजारीले पनि अन्न, पानी त्यागेका छन् । उनको साथसाथै स्थानीय महिलाहरुले महिला भक्तलाई दिन एवं रातमा समय मिलाएर सेवा गरि रहेका छन् ।
प्रतिक्रिया दिनुहोस् !