कलैया (बारा), २६ असोज । बाराका जनप्रतिनिधिनै सार्वजनिक जग्गाको दुरुपयोगमा उद्दत देखिएको तत्थ्य बाहिरिएको छ । जीतपुरसिमरा उपमहानगरपालिकामा रहेको सार्बजनिक जग्गाको माटो उत्खनन्मा यहाँकै जनप्रतिनिधिको मिलेमतो बाहिरिएको हो । वातावरणीय प्रभाव समेत मूल्याङ्कन नगरी जनप्रतिनिधि र सेजको ठेकेदारको मिलेमतोमा माटो उत्खनन् भएको हो ।
जनप्रतिनिधिको मिलेमतोमा अवैध ढंगले सार्वजनिक जग्गाबाट माटो चोरी हुँदा लाखौँ रुपैयाँ राजस्व समेत हिनामिना भएपछि अहिले यहाँका स्थानीय आक्रोसित बनेका छन् । जनप्रतिनिधिकै मिलेमतोमा सार्वजनिक जग्गाको चरम दुरुपयोग भएको तत्थ्य बाहिरिएको छ । बाराको जीतपुरसिमरा उपमहानगरपालिका–११ मा रहेको सार्वजनिक जग्गाको माटो चोरी गरि बेचविखन गर्न जनप्रतिनिधिसमेत सामेल भएको तत्थ्य बाहिरिएको हो ।
सार्वजनिक जग्गाबाट माटो उत्खनन गरेर विशेष आर्थिक क्षेत्र प्राधिकरण (सेज) लाई बेचेको पाईएको हो । जीतपुरसिमरा उपमहानगरपालिकाले केहि महिना पहिला आफ्नै निजी जग्गाबाट माटो उत्खनन गर्नको लागि उपमहानगरसँग अनुमति लिएर मात्र उत्खनन गर्न सूचना निकालेको थियो । सोहि सूचना अनुसार वडा न ११ का महमद दिन मियाँले वडा न ११ को कार्यालयमा दिएको निबेदन अनुसार निवेदकको आमा हसिना चुहिहारको नाममा दर्ता रहेको किता न ३५ को ५ बिघा जग्गा बाट १०० टिपर माटो निकाल्ने भन्दै निवेदन दिएका थिए । वडा न ११ को वडा अध्यक्ष बिन्दलाल साहले उपमहानगरलाई सिफारिस गरेको तर ३५ नम्बर किता सार्वजनिक जग्गा रहेको र त्यसको लालपूर्जा समेत नरहेको र वडा अध्यक्षले मिलोमतोमा सिफारिस गरेको आरोप लगाएको छ ।
वडा न ११ को कार्यालयले गरेको सिफारिस पत्रमा साबिक फत्तेपुर गाविस वडा नं ९ हाल जीतपुरसिमरा–११ को कित्ता नम्बर ३५ को ५ बिघा जग्गाबाट एक सय टिपर माटो निकाल्ने उल्लेख छ । तर, माटो भने कित्ता नं ४२ को १८ बिघा सार्वजनिक जग्गाबाट निकालिएको उपमहानगरका इन्जिनियर रुपाखेतीले जनाए । १८ बिघा सार्वजनिक जग्गामध्ये २ बिघाबाट करिब डेढदेखि २ मिटर गहिराइमा ५ सयदेखि ६ सय टिपर माटो उत्खनन भएको बताएको छ ।
कानुनतः निजी जग्गाबाट माटो उत्खनन गर्नु पूर्व प्राविधिक खटाएर वातावरणीय प्रभाव मूल्याङ्कन गर्नुपर्छ । जनप्रतिनिधि र सेजको ठेकेदारको मिलेमतोमा रातभर दर्जनौँको सङ्ख्यामा टिपरले माटो चोरी गरेको भन्दै स्थानीयले उपमहानगरमा उजुरी दिएपछि असोज १९ गते उपमहानगरको प्राविधिक टोली अनुगमनमा पुगेको थियो । अनुगमनमा माटो उत्खनन गरिरहेको एस्काभेटर नियन्त्रणमा लिएर उपमहानगरले थप अनुसन्धान सुरु गरेको छ । यता जीतपुरसिमरा उपमहानगरपालिकाको वडा न ११ का वडा अध्यक्ष बिन्दालाला साहले आफुले महमद दिन मियाँले दिएको निबेदन अनुसार नै सबै प्रक्रिया पुर्याएर सिफारिस गरेको उपमहानगरको कर्मचारीको कमीकमजोरीको कारण ४२ नम्बर कित्ताबाट माटो उत्खनन गरेरे बेचिएको आरोप लगाएका छन् ।
जीतपुरसिमरा उपमहानगरपालिकाको नगर उपप्रमुख भोला प्रसाद अधिकारी सहितको टोलीले सार्वजनिक जग्गाबाट माटो उत्खनन गरेको ठाउँको स्थलगत अनुगमन गरिसकेको छ र यसमा जनप्रतिनिधीको लापर्वाही हो कि कर्मचारीको थप अनुसन्धान गरेर कार्वाही हुने नगर उपप्रमुख अधिकारीले बताएका छन् ।
उपमहानगरले वडाध्यक्षको सिफारिसलाई विश्वास गरी वातावरणीय प्रभाव मूल्याङ्कन पनि नगरी राजस्व रकम लिएर २ दिनभित्र अनुमति दिएको थियो । जनप्रतिनिधिको मिलेमतोमा अवैध ढंगले सार्वजनिक जग्गाबाट माटो चोरी हुँदा लाखौँ रुपैयाँ राजस्व समेत हिनामिना भएको छ । 
प्रतिक्रिया दिनुहोस् !