• अनिल तिवारी
वीरगंज (पर्सा), २१ असोज । विद्यालयको शिक्षक सरुवा गरिएको बिरोधका विद्यार्थीहरु आन्दोलित भएका छन् । पर्साको विन्दवासिनी गाउँपालिका स्थित बहुअर्वाभाठ्ठामा रहेको राधा कृष्ण चौरसिया माध्यमिक विद्यालयको शिक्षक सरुवाको बिरोधमा विद्यार्थीहरु आन्दोलित भएका हुन् । राजनीतिक पुर्वाग्रहले शिक्षक सरुवा गरिएको भन्दै विवाद उत्पन्न भएको छ । गाउँपालिका कार्यालयले शिक्षक सरुवा गरेपछि त्यसको विरोधमा विद्यार्थीहरु आइतवार गाउँपालिका कार्यालय घेराउ गर्न पुगेका थिए ।
एकै पटक आधादर्जन भन्दा बढी शिक्षकहरुलाई गरिएको सरुवा फिर्ताको माग गर्दै विद्यार्थीहरु गाउँपालिका घेराउ गरेका थिए । अवस्था अनियन्त्रित भएपछि प्रहरीले बल प्रयोग गर्दा विद्यार्थीहरु घाइते भएको जनाइएको छ । गाउँपालिका घेराउ गर्न पुगेको बेला प्रहरी र विद्यार्थीबीच झडप भएको हो । झडपमा कृष्ण मुखिया, विशाल यादव, अरबिन्द पटेल, निरज यादव, खेम बहादुर गोढ र अनुराग कुमार यादवलाई चोटपटक लागेको छ । घाइते भएका कक्षा ९ मा अध्ययनरत छात्र खेमबहादुर गोढले आफुहरु गुनासो लिएर गाँउपालिकामा आउँदा एक्कासी प्रहरीले लाठीचार्ज गरेर दमन गरेको बताए ।
शिक्षकद्वय विनोद राउत र धर्मेन्द्र चौबेको सरुवा पछि पठनपाठन प्रभावित भएकोले आफुहरुले सरुवा फिर्ता मागं राखेको गोढको भनाइ थियो । प्रधानाध्यापक नन्दु प्रसाद यादवले विद्यालयमा व्यापक अनियमितता गरेको भन्दै उनको सरुवा हुनुपर्ने माग आफुहरुको रहेको गोढले बताए । यस्तै प्रदर्शनमा सहभागी कक्षा ९ मै अध्ययनरत छात्रा नितु यादवले प्रहरीले गुण्डागर्दी शैलीमा विद्यार्थीहरुमाथि लाठी बर्साएको बताइन् । उनले विद्यालयमा आफुहरुको मागको सुनुवाई नभएपछि गाँउपालिकामा आउँदा प्रहरीले कुटपिट गरेर घाइते बनाएको आरोप लगाइन् ।
घटनास्थलमा खटिएका ईलाका प्रहरी कार्यालय पोखरियाका प्रहरी निरीक्षक मोहनविक्रम केसीले अवस्था अनियन्त्रित भएपछि नियन्त्रण गर्दा केहि विद्यार्थीहरु घाइते भएको बताए ।अवस्था नियन्त्रण भएपछि समस्या समाधानका लागि आन्दोलन विद्यार्थी र गाँउपालिकाका जनप्रतिनिधी बिच छलफलको प्रयास भइरहेको बताए । 
प्रतिक्रिया दिनुहोस् !