• मुस्कान श्रेष्ठ
वीरगंज (पर्सा), १६ असोज । पर्सा प्रहरीले महिलाको हत्या गरेको आरोपमा ३ जनालाई नियन्त्रणमा लिइ आज सार्वजनिक गरेको छ । जिल्लाको जगरनाथपुर गाउँपालिका वडा नम्बर ५ मसिहानीकी ५६ वर्षीया कान्ती वीनको हत्या गरेको आरोपमा प्रहरीले ३ जनालाई पत्रकार सम्मेलनको आयोजना गरी जानकारी गराएको हो ।
गत असोज २ गते मंगलबार दिउँसो मृतक कान्ती वीनको कोठा भित्र घाटी रेटी हत्या गरेको अवस्थामा शव फेला परेको थियो । घटनाको जानकारी पाए लगतै जिल्ला प्रहरी कार्यालय पर्साबाट खटिएको प्रहरी टोलीले घटनाको अनुसन्धान गरी उनीहरुलाई नियन्त्रणमा लिएको हो । प्रकाउ पर्नेमा मृतकका जेठाजु चन्द्रिका राउत वीन, अमीरीका राउन विन र लालबाबु राउत वीन रहेका छन् ।
मृतक कान्ती वीनका छोरा अर्जुन राउत वीन रोजगारीका शिलसिलामा मेलेसियामा रहेकोे र घरपरिवारलाई पैसा पठाउने गरेका थिए । छोराले पठाएको पैसा कान्तीले आफूसंग राखेको जानकारी पाएपछि मृतकका जेठाजुुसहित ३ जनाले घरमा चोरी गर्ने योजनासहित सुरुङ बनाई घरभित्र प्रवेश गरेको जिल्ला प्रहरी कार्यालय पर्साका प्रहरी उपरीक्षक कोमल शाहले जानकारी दिए ।
उनका अुनसार घटनाको थप अनुसन्धान गर्दै जाँदा आरोपीहरुले बाक्सामा रहेको सामानहरु खोतल्ने क्रममा मृतकले उनीहरुलाई देखेपछि आफूहरुको पोल खुल्ने डरले मृतक कान्तीको टाउँकोमा रडले प्रहार गरी सिरानीले मुख थिचेर खुर्पीले घाटी रेटी हत्या गरेका थिए । आमाको हत्या भएको जानकारी भए पश्चात छोरा अर्जुन विदेशबाट घर फर्केर गत असोज ७ गते अभियुक्त लालबाबु राउत वीनको नाममा किटानी जाहेरी दिएका थिए ।
प्रहरी उपरीक्षक शाहले घटनाको १२ दिनपछि उनीहरुलाई नियन्त्रणमा लिएको र घटनाको विषयमा थप अनुसन्धान भइरहेको बताए ।
प्रतिक्रिया दिनुहोस् !