हिन्दु धर्मको पहिचान समाप्त हुने अवस्था आयो : अध्यक्ष थापा

• मुस्कान श्रेष्ठ
वीरगंज (पर्सा), १४ असोज । राष्ट्रिय प्रजातन्त्र पार्टी नेपालका अध्यक्ष कमल थापाले नेपालमा हिन्दु धर्मको पहिचान समाप्त हुने अवस्था आएको बताएका छन् । आईतबार वीरगञ्जमा अयोजित बृहत आम सभालाई सम्बोधन गर्दै अध्यक्ष थापाले धर्म निरपेक्षताको आडमा योजनाबद्ध रुपमा धर्म परिवर्तन गराउने सड्यन्त्र भइरहेको बताए । उनले. जनताहरु माझ भ्रम सृजना गरी सनातन हिन्दु धर्मलाई कमजोर बनाउन खोजेको आरोप लगाए । उनले पहाडबाट सुरु भएको धर्म परिवर्तनको डढेलो केहि समय यतादेखि मधेशमा समेत सल्किन थालेको बताए ।

उनले आन्दोलनको बेला कसैले हिन्दु राष्ट्रको पक्षमा आवाज नउठाएको प्रति दुःख व्यक्त गरे । पश्चिमा मुलुकहरुको दबाब र प्रभावमा  परेर नेपाली कांग्रेस लगायतका ठूला दलहरुले धार्मीक स्वतन्त्रता र धर्म निरपेक्षताको नाममा हिन्दु राष्ट्रको पहिचान समाप्त पारेको अधयक्ष थापाको भनाई छ । केहि समय अघी सर्लाहीको मलंगवामा मुर्ती सेलाउने क्रममा भएको झडपको प्रसंग जोड्दै अध्यक्ष थापाले दोषीलाई कारवाही गर्नुपर्ने ठाउँमा उल्टै संरक्षण गरेर धार्मीक द्वन्द चर्काउने प्रयास भएको आरोप लगाए ।

उनले विगत ढेड दशकदेखि सत्तामा रहेका ठूला दलहरुले राज्यका विभिन्न अंगहरुमा आफ्ना कार्यकर्ताहरु भर्ना गरी राज्य संयन्त्रणलाई कब्जा गरेर भ्रष्टचार गरिरहेको बताए । उनले हिन्दु राष्ट्रको पुर्नस्थापना, संघीयताको खारेजी र सुशासनको माध्यमबाट जनताको समृद्धिका निमित्त तेश्रो जनआन्दोलनको तयारीको घोषणा गरिएको बताए । सभा अघी राप्रपा नेपालका अध्यक्ष थापाले मधेश आन्दोलनमा शहीद भएकोहरुको शालिकमा माल्यापर्ण गरेका थिए ।