गौर (रौतहट), १३ असोज । रौतहटमा विद्युत चोरी रहेको अवस्थामा विद्युत प्राधिकरणले फेला परेर कारवाही प्रक्रिया अगाडि बढाएपछि माओवादी केन्द्रका नेताहरुले विद्युत प्राधिकरणका कर्मचारीहरुलाई धम्की दिएका छन् । विद्युत प्राधिकरणले मिटर छड्के जाँच गर्दा जिल्लाको वृन्दावन नगरपालिका वडा नम्बर ३ का रामप्रसाद पटेलको घरमाबाट मिटर बेपता पारी सर्भिस केवलबाट सोझैं जडान गरी मोटर, पंखा बती लगायत अन्य विद्युतिय उपकरणहरु चलाइरहेको अवस्थामा फेला पारिएको चन्द्रनिगाहपुर वितरण केन्द्रका प्रमुख धिरेन्द्र कुमार यादवले बताए । पटेल माओवादी केन्द्रबाट गत स्थानीय तहको निर्वाचनमा वृन्दावन नगरपालिकाका नगर प्रमुखका प्रत्यासी हुन् ।
नेता पटेलले उनको घरमा शंकर राउतको नाममा ग्राहक नम्बर ००९१५०७३ जडान रहेको मिटर बिगारेर चोरी गरेको फेला परेपछि सो घरमा रहेका विद्युतिय सामाग्रीहरु खोलेर केन्द्रमा ल्याउँदा पटेल र सोही नगरपालिका वडा नम्बर २ का वडाध्यक्ष सिकिन्दर पटेलले असोज ११ गते बिहिबार ४०–४५ जना मानिसहरु ल्याएर कार्यालयमा आफ्नो कार्यकक्षमा कर्मचारीहरुलाई तथानाम गाली गलौज गरी आफुलाई हातपात गर्न खोजेको वितरण केन्द्रका प्रमुख यादवले बताए ।
‘उनीहरुले मलाई हातपातको प्रयास गर्नुका साथै अबदेखी चुहावटमा कारवाही भयो भने कर्मचारीहरुको हातसात भाचिदिने धम्की दिएका छन्,’ उनले भने, ‘यस्तो असुरक्षित र त्रासको वातावरणमा काम गर्न सकिदैन् । हामीलाई सुरक्षा चाहियो ।’ पटेलले आफुलाई ५ दिनभित्र सरुवा गर्ने धम्की दिएको यादवको भनाइ छ। उनले मान्छेहरुले जतिसुकै दवाव र धम्की दिएपनि आफुहरुको चुहावट नियन्त्रण र चुहावट गर्नेहरुलाई कारवाही गर्ने अभियान कुनै पनि हालतमा नरोकिने बताउँदै दोषी उपर कारवाहीको माग गरे ।
विद्युत चोरी गर्नेहरुले गल्ती महसुष गर्नुको सट्टा उल्टै कर्मचारीहरुलाई तर्साउने, धम्की दिने , आक्रमण प्रयास गर्ने गरेकाले आफुहरु असुरक्षित वातावरणमा काम गर्न नसक्ने भन्दै सुरक्षाको माग गरेर इलाका प्रहरी कार्यालय चन्द्रनिगाहपुरमा निवेदन दिएका छन् । निवेदनमा वडाध्यक्ष पटेलले यस अघिपनि बारम्बार चुहावट कारवाही हुँदा सो कार्यालयमा आई आफ्नो अनुकूल जरिवाना तोक्न लगाउने र कर्मचारीले नमानेमा धम्कीदिने गर्ने गरेको उल्लेख छ ।
यता राम प्रसाद पटेलले भने आफु सो घरमा धेरै नबस्ने हुँदा घरमा विद्युत चोरी भएको विषयमा आफु जानकार नभएको र प्राधिकरणमा आफु धम्की दिन नभइ घटना बारे बुझ्न गएको जिकिर गरे । 
प्रतिक्रिया दिनुहोस् !