वीरगंज (पर्सा), ६ असोज । कलैया उपमहानगरपालिका – ४ का वडाध्यक्ष रामेश्वर प्रसाद यादवले छड सिमेन्ट नपाएपछि घर भत्काएको घटनामा अर्का वडाध्यक्षको पनि संलग्नता रहेको पाइएको छ । कलैया उपमहानगरपालिका वडा नं. २३ घर भई वडा नं. ४ हनुमान मन्दिर स्थित छड सिमेन्टको गोदाम संचालन गर्दै आएका अनिल पटेलको गोदामलाई सडक फराकिलोको बहानामा भत्काइएको घटनामा नयाँ रहस्य बाहिरिएको हो । दुईजना वडाध्यक्षले आफ्नो स्वार्थ सिद्ध नहुँदा उनको गोदाम भत्काएको पाइएको हो ।
वडा नं. ४ का वडाध्यक्ष रामेश्वर प्रसाद यादवले छड सिमेन्ट नपाएको तथा वडा नं. ६ का वडाध्यक्ष रामविश्वास ठाकुरले उधारो लिएको छड सिमेन्टको पैसा माग गरेपछि दुबैजना मिली पटेलको गोदामलाई नै भत्काउने योजना बनाएको घरधनी पटेलले जानकारी दिए । वडा नं. ६ का वडाध्यक्ष रामविश्वास ठाकुरले घरधनी अनिल पटेलसँग यही २०८० वैशाखमा सडक निर्माण भइरहेको बखत ८ लाख ७५ हजार रुपैयाँको छड, सिमेन्ट, गिट्टी, बालुवा उधारो लिएर हालसम्म नदिएको र माग गर्दा वडा नं. ४ का वडाध्यक्ष रामेश्वर प्रसाद यादवसँग मिलेर गोदाम भत्काएको पटेलको आरोप छ ।
यसैगरि वडा नं. ४ का वडाध्यक्ष राामेश्वर प्रसाद यादवले असार मसान्तमा आफ्नो निजी कार्यको लागि पटेलसँग १ करोड बराबरको छड सिमेन्ट उधारो मागेका थिए । छड सिमेन्ट उधारो नदिएपछि वडाध्यक्षले पटेलको गोदाम नै भत्काइदिने योजना बनाइएको बताइएको छ । निजी कामको लागि १ करोड बराबरको छड सिमेन्ट उधारो नदिएकाले वडाध्यक्ष यादवले पटक पटक सडक विस्तारको नाममा गोदाम तोड्ने धम्की दिँदै आएको घरधनी पटेलको भनाई छ । एक हप्ता अघि पनि वडाध्यक्षले घर तोड्ने धम्की दिएको घरधनी पटेलको भनाई छ ।
कलैया बरियारपुर हुलाकी सडक खण्ड अन्तर्गत वडा नं. ४ स्थित पर्ने हनुमान मन्दिरदेखि उत्तरपट्टि कलैया अदालतसम्म जाने बाटो बनाउने नाममा हनुमान मन्दिर स्थित निजी जग्गामा निर्माण गरिएको गोदाम भत्काइएको हो । नक्सामा बाटो कायम नरहेको अवस्थामा पटेल र उनको विपरित दिशामा रहेका जग्गाधनीले १०/१० फिट जग्गा दिई बाटो बनाएका थिए । कलैया उपमहानगरपालिकाका पूर्व नगरप्रमुख राजेश राय यादव एवं पूर्ववडाध्यक्ष जाटाशंकर सहनीको पहलमा सामाजिक व्यवहार अनुसार दुबै पक्षबाट १०/१० फिट जग्गा लिई २० फिटको बाटो निर्माण गराएका थिए ।
पटेलले सडक निर्माणको लागि आफ्नो निजी जग्गाबाट १० फिट दिएपछि वडाध्यक्ष यादवले छड सिमेन्ट उधारो नदिएकै कारण रिसिबी साध्न ३० फिटको सडक निर्माण गर्ने भनेर घर भत्काएका हुन् । वडाध्यक्ष यादवले वडा नं. ६ का वडाध्यक्ष रामविश्वास ठाकुर सहित उनका बाउन्सर, कार्यकर्ता एवं कलैया उपमहानगरपालिकाका नगर प्रहरी सहित डोजर बोलाएर एकाविहानै घर तोडेको पटेलको भनाई छ । छड सिमेन्ट नदिएको कुरालाई लिएर वडाध्यक्षद्वयले आफ्नो गोदाम तोड्ने योजना बनाएको एक हप्ता अघि मात्रै पटेलले सुइँको पाएका थिए । वडाध्यक्ष यादवले अचानक फोन गरेर घर कहिले तोड्ने भनेपछि आफू आश्चर्यमा परेको र किन तोड्ने भनेर सोधपुछ गर्दा नापजाँच गरेर चिन्ह् लगाईदिएको वडाध्यक्षले जवाफ दिएपछि उनको ग्राइन डिजाइनबारे घरधनी पटेल जानकारी पाएका थिए ।
त्यस लगत्तै उनले उच्च अदालत जनकपुर, अस्थायी इजसाल वीरगंजमा भदौ २९ गते मुद्दा दर्ता गराएका थिए । उच्च अदालतले असोज ७ गते आइतबार छलफल पेशीको लागि कलैया उपमहानगरपालिकालाई पत्र पठाए पश्चात वडाध्यक्षले अदालतको पत्रलाई अपहेलना गर्दै असोज ५ गते एकाविहानै दलबल सहित पुगी घर भत्काएका थिए ।
प्रतिक्रिया दिनुहोस् !