• हरिशंकर शर्मा
वीरगंज (पर्सा), ४ असोज । छिपहरमाई गाउँपालिकाले आर्थिक वर्ष २०७८/०७९ मा चन्दाको नाममा साढे १८ लाख बढि रकम सिध्याएका छन् । आफ्नो आसेपासे एवं कार्यकर्ताहरुलाई विभिन्न पर्वको बहानामा चन्दाको नाममा १८ जनालाई १८ लाख ५८ हजार बजेट सिध्याएका हुन् । कोष तथा लेखा नियन्त्रण कार्यालयले सार्वजनिक गरेको २०७८/०७९ को लेखापरीक्षण प्रतिवेदनमा अनुत्पादक कार्य भन्दै १८ लाख ५८ हजार बेरुजु देखाएको छ । अध्यक्ष गुप्ताले तीन देखि चार महिनाको अवधिमा मात्रै चन्दाको नाममा साढे १८ लाख बढि रकम झ्वाम बनाएका छन् । गाउँपालिका श्रोतका अनुसार कमिशनको लागि आफ्नो कार्यकर्ताहरुलाई विभिन्न पर्वको बहानामा पालिकाको बजेटमा भ्रष्टाचार गरेको बताइएको छ । अध्यक्ष गुप्ताले २०७८ कात्तिकदेखि माघसम्ममा १८ जनालाई विभिन्न चन्दाको बहानामा १८ लाख ५८ हजार रुपैया पालिकाको बजेट सिध्याएका छन् ।
उनले छिपहरमाई गाउँपालिका वडा नं. ५ मा बकरईद मनाउन अयुब अन्सारीलाई ७५ हजार रुपैया, वडा नं. २ मा बकरईद मनाउन वृजेश प्रसाद यादवलाई १ लाख २५ हजार रुपैयाँ, वडा नं. २ मा छठघाट निर्माण गर्न करन साह कलवारलाई १ लाख २५ हजार रुपैयाँ, वडा नं. ५ मा छठघाट निर्माण गर्न केदार सहनीलाई १ लाख रुपैयाँ, केदार सहनीर्लाइ नै पुनः दिपावली मनाउन २० हजार रुपैयाँ, केदार सहनीलाई छठघाट निर्माण गर्न तेश्रो पटक २ लाख रुपैयाँ, वडा नं. १ मा छठघाट निर्माण गर्न राजकिशोर प्रसाद चौरसियालाई ५० हजार रुपैयाँ, वडा नं. ३ मा छठघाट निर्माण गर्न राजकिशोर प्रसाद चौरसियालाई नै पुनः ५० हजार, वडा नं. ४ मा छठघाट निर्माण गर्न साहेब महतोलाई ७५ हजार रुपैयाँ, वडा नं. १ मा बकरईद मनाउन राजकिशोर प्रसाद चौरसियालाई नै पुनः तेश्रो पटक ७५ हजार रुपैयाँ, वडा नं. २ मा छठघाट निर्माण गर्न केदार सहनीलाई नै चौथो पटक ३ लाख ५० हजार रुपैयाँ, वडा नं. ३ मा बकरईद मनाउन राजकिशोर प्रसाद चौरसियालाई नै पुनः चौथो पटक ८६ हजार रुपैयाँ, वडा नं. ३ मा छठघाट निर्माण गर्न राजकिशोर प्रसाद चौरसियालाई नै पाँचौ पटक २ लाख रुपैयाँ, वडा नं. १ मा छठघाट निर्माण गर्न राजकिशोर प्रसाद चौरसियालाई नै छैठो पटक २ लाख ७५ हजार रुपैयाँ र वडा नं. ५ मा दुर्गा पुजाको लागि केदार सहनीलाई पाँचौ पटक ५० हजार रुपैया दिएका छन् ।
अध्यक्ष गुप्ताले छिपहरमाई गाउँपालिकाबाट साढे १८ लाख रुपैयाँमध्ये राजकिशोर प्रसाद चौरसियालाई मात्रै ६ पटक गरि ७ लाख ३८ हजार रुपैयाँ चन्दा दिएका छन् भने केदार सहनीलाई ५ पटक गरि ६ लाख २० हजार रुपैयाँ दिएका छन् । अध्यक्ष गुप्ताले आफ्ना आसेपासेलाई एवं कार्यकर्ताहरुलाई खुसी पार्नको लागि जनताको करको पैसालाई धुवाँ जस्तो उडाएका छन् । आफू पुर्खयौली धनाड्य रहेको रवाफ देखाउने गुप्ता आफ्नो खल्तीबाट चन्दा दिनुपर्नेमा कार्यकर्तालाई खुसी पार्न एवं कमिशन असुल्नको लागि धर्मको नाममा लुटतन्त्र नै मच्चाएका छन् । पालिका आफ्नो निजी सम्पत्ति रहेको जस्तो धर्मको नाममा दुईजना कार्यकर्तालाई दिपावली पर्व मनाउन भनेर पैसा बाँडेका छन् र यस कार्यमा तत्कालीन प्रमुख प्रशासकीय अधिकृतले साथ दिएको बताइएको छ । कोष तथा लेखा नियन्त्रण कार्यालयले सार्वजनिक गरेको लेखा परीक्षण प्रतिवेदनमा देखिएको बेरुजु बजेटबाट चन्दा लिनेमा यि दुईजना मात्रै गरिब विपन्न परिवारका रहेछन् भन्ने गाउँपालिकाबासीले बुझ्नुपर्ने देखिन्छ । अध्यक्ष गुप्ताले चन्दा पनि दिने बेलामा कुन धर्मको नाममा कुन धर्मावलम्बीलाई रकम दिइएको छ ? ख्याल समेत गरेका छैनन्, यसैबाट उनले गरेको भ्रष्टाचारको पुष्टि हुन्छ । बकरईद मनाउन यादव र चौरसिया थरका कार्यकर्तालाई बजेटबाट रकम दिएका छन् ।
कोष तथा लेखा नियन्त्रण कार्यालयका अनुसार ‘स्थानीय सरकार संचालन ऐन, २०७४ मा कुनै संस्था वा व्यक्तिलाई पर्व, जात्रा, उत्सव मनाउन खर्च तथा सहयोग गर्ने व्यवस्था भएको देखिदैन । पालिकाले निम्न गोधारा भौचरबाट निम्न सम्बन्धित प्रतिनिधिहरु तथा कर्मचारीलाई छठ, तिहार, दशैं, होली, शिवरात्री आदी पर्व मनाउन पालिकाबाटै वडाहरुलाई योजना छनौट गरी बजेट व्यवस्था गरी टुक्रा-टुक्रा पारी खर्च गरेको छ । ती कार्यले पूँजी निर्माणमा योगदान पुर्याउने अंश घट्न गई पूँजीगत कार्य प्रगतिमा असर गर्ने अवस्था एकातिर देखिन्छ भने अर्को तर्फ यस्तो खर्चले प्रतिफल नदिने हुन्छ । यस्तो वितरणमुखी एवं आर्थिक सहायता वितरण प्रक्रियालाई नियन्त्रण गर्नुपर्ने भनी गतविगतमा सुझाउ दिँदै आएकोमा यो वर्ष पनि विभिन्न व्यक्ति तथा संस्थालाई रु. १८,५८,०००/- वितरण गरेको छ । यस्तो खर्च कानून सम्मत नभएकोले अनियमित भएकोले यस्तो खर्चमा नियन्त्रण हुनुपर्दछ ।’ भन्ने उल्लेख गरेको छ ।
जनताले तिरेको करबाट विकास निर्माण गर्नुपर्नेमा अध्यक्ष गुप्ताले कसरी लुट्न सकिन्छ भन्ने तल्लिन रहेको लेखा परीक्षण प्रतिवेदनबाटै पुष्टि हुन्छ । जनताले तिरेको कर अध्यक्ष गुप्तालाई धर्मको नाममा कार्यकर्तालाई बाँड्नको लागि दिइएको हो ? कि विकास निर्माणको लागि दिइएको हो भन्ने छिपहरमाईबासीहरुले सामाजिक सञ्जाल मार्फत विरोध जनाउन थालेका छन् । छिपहरमाई गाउँपालिकाका युवा जितेन्द्र यादवले सामाजिक सञ्जालमा कोष तथा लेखा नियन्त्रण कार्यालयले सार्वजनिक गरेको लेखा परीक्षण प्रतिवेदन सार्वजनिक गर्दै ‘गापा अध्यक्ष गुप्ता जी यहीँ विकास हो ? बजेटलाई चन्दाको रूपमा वितरण गर्नु ? यादवले बकरीद मनाउन छ कि १ लाख २५ हजार बकरीद मनाउन चन्दा दिनु भएको छ कति कमिशन खाएर बजेटलाई चन्दाको रूपमा बाँड्नु भएको छ ? विद्यालायमा शिक्षक व्यवस्था गर्ने बजेट छैन् र चन्दा बाड्न बजेट छ ? कति राम्रो विकासको नमूना पेश गर्नु भएको छ ?’ भनेर लेखेका छन् । यसैगरि इन्जिनियर राहुल कुमार पाण्डेलेपनि सामाजिक सञ्जालमा लेखा परीक्षण प्रतिवेदन पोष्ट्याउँदै सोही प्रश्नलाई दोहर्याएका छन् ।
प्रतिक्रिया दिनुहोस् !