• हरिशंकर शर्मा
वीरगंज (पर्सा), २७ भदौ । वीरगंज महानगरपालिका – ४ वीर्ता स्थित बालसुधार गृहका बालकैदीहरुबीच मंगलबार राति झडप हुँदा ९ जना कैदी घाइते भएका छन् । मंगलबार राति करिब ८ बजेदेखि कैदीहरुबीच भएको उत्पन्न विवादलाई नियन्त्रण लिन पुगेका प्रहरीमाथि कैदीहरुले गरेको ढुंगामुढाले ३ जना प्रहरी घाइते भएको छ ।
बाल सुधार गृहमा विगत २ हप्ता अघि भक्तपुर स्थित बाल सुधार गृहबाट ल्याइएका १८ जना कैदी र वीरगंज स्थित पहिलादेखि नै बस्दै आएका बालकैदीहरुबीच विवाद भई झडप हुँदा भक्तपुर स्थितका १२ जना कैदी घाइते भएका छन् भन् बालसुधार गृह मंगलबार रातिदेखि बुधबार दिउँसोसम्म तनावग्रस्त छ । अहिले पनि कैदीहरुले ढुँगामुढा नै गरि रहेका छन् । प्रहरीले अवस्थालाई नियन्त्रण गर्न प्रयास गरेपनि असफल रहेको छ । विवाद उत्पन्न भएदेखि नै जिल्ला प्रहरी कार्यालय पर्साका प्रहरी उपरीक्षक कोमल शाहको नेतृत्वमा धेरै संख्यामा नेपाल प्रहरी एवं सशस्त्र प्रहरी बल १३ नं. गणबाट ठुलै संख्यामा सशस्त्र प्रहरी पनि परिचालन गरिएको छ तर स्थिति नियन्त्रणमा आउन सकेको छैन ।
मंगलबार राति भएको झडपमा भक्तपुरबाट ल्याइएका मध्ये ९ जना बालकैदी एवं ३ जना प्रहरी घाइते भएका छन् । घाइते भएका सुधार गृहका ९ जना बालकलाई मङ्गलवार राति नारायणी अस्पतालमा उपचार गराई जिल्ला प्रहरी कार्यालय पर्साको हिरासतमा राखिएको छ । भक्तपुरको बाल सुधार गृहमा भदौ ४ मा उत्पात मच्चाएकामध्ये १८ जना बाल कैदीहरूलाई वीरगंजको बाल सुधार गृहमा ल्याएर राखिएको थियो । भक्तपुरबाट ल्याएर राखिएका बालकहरूले मङ्गलवार बेलुकी सुधार गृहका नाइकेसँग विवाद गरेर कुटपिट गरेपछि यहाँका बालकैदी र भक्तपुरबाट ल्याइएका बालकैदीबीच झडप भएको थियो ।
सुधार गृहभित्र उनीहरुले तोडफोड गर्न थालेपछि ठूलो संख्यामा नेपाल प्रहरी र सशस्त्र प्रहरी परिचालन गरिएको थियो । प्रहरीले स्थिति नियन्त्रणमा लिन आधा दर्जन भन्दा बढि राउण्ड अश्रु ग्याँस पनि प्रहार गरेको थियो । बालकैदीहरुले बुधबार दिउँसोसम्म पनि होहल्ला, तोडफोड एवं प्रहरीमाथि ढुँगामुढा नै गरि रहेका छन् । प्रहरीले अवस्थालाई साम्य पार्न प्रयास गरेपनि अवस्था सामान्य हुन सकेको छैन । विवाद उत्पन्न भएदेखि १६ घण्टा भन्दा बढि समय वितिसक्दा पनि बालकैदीहरुले प्रहरीलाई सुधार गृह भित्र प्रवेश गर्न दिएको छैन ।
उनीहरु प्रदर्शन गर्ने क्रममा पर्खाल माथिको फलामको रेलिङ्ग नाघी सडकमा आई सञ्चारकर्मीहरुसँग कुराकानी गर्न प्रयास पनि गरेको थियो ।
होहल्लाकै क्रममा केही कैदीहरु पर्खाल नाघी सडकमा आएर आफूहरुमाथि सुधार गृहका नाइकेले दिने गरेको यातनाबारे जानकारी गराएका थिए । भक्तपुरबाट आएका बालकैदीहरुले आएदेखि नै यहाँ बस्ने मनसायमा थिएनन् । अस्पतालमा भर्ना भएका भक्तपुरबाट आएका बालकैदीहरुले यस बालसुधार गृहमा खुलेयाम बालअधिकारको हनन् हुने गरेको बताएका छन् । उनीहरुले यहाँ खाना राम्रो नपाउने, फोन गर्दा प्रतिकल १ सय रुपैया लिने गरेको, एउटै कोठामा धेरै जनालाई कोचेर राखेको तथा गृह प्रमुखले यातना दिने गरेको बताए ।
भक्तपुर बाल सुधार गृहबाट ल्याइएका १८ जना बालकहरु यहाँ नबस्ने भन्दै विरोध जनाउँदै आएका थिए । त्यही विषयलाई लिएर मंगलवार बेलुकी सुधार गृहका नाइकेसँग विवाद गरी कुटपिट गरेपछि सुधार गृहमा कैदीहरुबीच झडप भएको थियो । पर्साका प्रहरी उपरीक्षक कोमल शाहले सुधार गृहभित्रको स्थिति सामान्य बनाउन प्रयास हालसम्म प्रयासरत छन् भने प्रमुख जिल्ला अधिकारीसहितको टोली पनि घटनास्थल पुगेर समस्या समाधानको प्रयास भइरहेको छ । बालसुधार गृहमा ६५ जना बालकलाई राख्ने क्षमता रहेकोमा १ सय ५१ जना बालकैदीहरु राखिएको छ ।
प्रतिक्रिया दिनुहोस् !