वीरगंज (पर्सा), २२ भदौ । मधेश प्रदेशमा भारतीय बीमा कम्पनीहरुको दबदबा रहेको सरोकारवालाहरुले बताएका छन् । नेपाल बीमा प्राधिकरण मधेश प्रादेशिक कार्यालय वीरगंजले आयोजना गरेको ‘आर्थिक पत्रकारसँग नेपाल बीमा प्राधिकरण’ विषयक अन्तरक्रिया तथा छलफल कार्यक्रममा सहभागी सरोकारवालाहरुले मधेश प्रदेशमा भारतीय बीमा कमपनीहरुको दबादबा रहेकोले नेपाली बीमा कम्पनी कमजोर भएको बताएका छन् । नेपाली बीमा कम्पनीहरुले नेपालकै मधेश प्रदेशमा आफ्नो विश्वास कायम गर्न नसकेको कारण पनि भारतीय बीमा कम्पनीहरुले आफ्नो दबदबा बनाएकोले यसलाई चिर्दै नेपाली बीमा कम्पनीहरुले मधेश प्रदेशमा आफ्नो दबदबा बनाउन सक्नुपर्नेमा जोड दिए ।
कार्यक्रममा नेपाल पत्रकार महासंघ पर्साका अध्यक्ष अनुप तिवारीले वीरगंजबाट मासिक १ करोड रुपैयाँभन्दा बढी प्रिमियम एउटै भारतीय बीमा कम्पनीले लगि रहेको दाबी गरे । यस्तो अवस्थामा एकातिर नेपाली बीमा कम्पनीहरु आक्रमक रुपमा बजारमा सक्रिय हुनुपर्ने सुझाव दिदै अर्कोतिर बीमाको माध्यमबाट भारततर्फ भई रहेको पुँजी पलायन पनि रोक्नु पर्ने कुरामा जोड दिए । उनले मधेशको ठूलो जनसंख्याले अझै पनि बीमाको महत्व नबुझेको अवस्था रहेको भन्दै गाउँघरका किसान अझै पनि बीमाबारे अनभिज्ञ नै रहेकोले उनीहरुलाई बीमा बारे धेरै भन्दा धेरै जनचेतना जगाउनुपर्ने बताए । गाउँघरका किसानहरुलाई अहिलेपनि कृषि, पशु र बाली बीमाजस्ता किसानको हितकारी बीमाबारे ज्ञात नरहेकोले यस्ता बीमा कार्यक्रमहरुबारे गाउँघरका किसानहरुलाई जानकारी गराउनुपर्ने बताए ।
पत्रकार महेशचन्द्र गौतमले पछिल्लो समय जीवनभन्दा निर्जीवन बीमाले धेरै सेवाग्राही लाभान्वित हुने अवस्था रहेपनि यो बीमाबारे शिक्षित वर्गसमेत अनभिज्ञ रहेको बताए । उनले निर्जीवन बीमालाई पनि जीवन बीमा सरह जनमानसमा प्रभावकारी रुपमा बिस्तार गर्न सुझाव दिए । पत्रकार निरज पिठाकोटेले जीवन बीमालाई मृत्यु र जीवनसँग मात्र जोडेर हेर्ने परिपाटीको अन्त्य हुन जरुरी रहेको बताए । बीमा प्राधिकरण मधेश प्रदेश कार्यालकी प्रमुख कुसुम शर्माले अन्य प्रदेशको तुलनामा मधेश प्रदेशमा बीमा साक्षरताको अवस्था कमजोर रहेको बताइन् ।
कार्यक्रममा प्राधिकरण प्रादेशिक कार्यालयका सहायक निर्देशक अनिश तिमल्सेनाले हाल मधेश प्रदेशमा जीवन बीमाका १ सय २३ शाखा, ७१ उपशाखा रहेको र त्यसमा ४ सय ६८ कर्मचारीले रोजगारी पाएको बताए । त्यसैगरी, प्रदेशमा निर्जीवन बीमाका ९४ शाखा, २३ उपशाखा रहेको र त्यसमा ४ सय ३ जनाले रोजगारी पाएको बताए । मधेश प्रदेश भरीमा आव २०७९/०८० मा २ लाख १५ हजार २ सय २६ निर्जीवन बीमा लेख जारी हुँदा २ अर्ब ४७ करोड १० लाख ७९ हजार रुपैयाँ बीमा शुल्क संकलन भएको बताए । सोही आवमा ५ लाख ७४ हजार ४ सय १२ वटा जीवन बीमा लेख जारी हुँदा १३ अर्ब १५ करोड ९६ लाख ९८ हजार रुपैयाँ बीमा शुल्क संकलन भएको बताए ।
मधेश प्रदेश सरकारले यस वर्षको बजेटमा सरल र सहजरुपमा उन्नत जातको कृषि तथा पशुपन्छी बिमामा २० करोड बजेट विनियोजन, निजामती कर्मचारीका लागि १० लाख रुपैयाँको दुर्घटना बीमा र प्रत्येक नागरिकका लागि २ लाख रुपैयाँ बराबरको विपद् जोखिम बीमाको व्यवस्था गर्नु स्वागतयोग्य रहेको उनले बताए ।
प्रतिक्रिया दिनुहोस् !