वीरगंज (पर्सा), १७ भदौ । वीरगंजको विर्तास्थित त्रिजुद्ध माविमा ५ दिने निशुल्क आँखा तथा दाँत परीक्षण शिविर सुरु भएको छ । वीरगञ्ज सामुदायिक आँखा अस्पतालको प्राविधिक सहयोग र साहिब दरबारको आयोजनामा आइतबारदेखि ५ दिने शिविर सुरु भएको हो । विद्यार्थी संख्या धेरै भएको हुँदा पढाई प्रभावित नहुने गरी ५ दिनसम्म सबै विद्यार्थीको आँखा तथा दाँत जाँच गर्ने गरी शिविरको आयोजना गरिएको साहिब दरबारका अध्यक्ष उमेशलाल सहनीले बताउनु भयो ।
शिविरमा विद्यार्थीहरुको आँखा तथा दाँतको परीक्षण गरिने वीरगञ्ज सामुदायिक आँखा अस्पतालका व्यवस्थापक प्रेम घिमिरेले जानकारी दिनुभयो । शिविरमा अस्पतालका नेत्र विशेषज्ञ प्रभात चौरसिया नेतृत्वको टोलीले विद्यार्थीहरुको आँखा जाँच गरीरहेको छ । शिविरमा आँखाको समस्या देखिएकाहरुलाई निशुल्क रुपमा औषधि समेत वितरण गरिएको घिमिरेले जानकारी दिनुभयो ।
पछिल्लो समयमा आँखा पाक्ने रोग फैलिएपछि विद्यालयमै शिविरको आयोजना गरेर सबै विद्यार्थीको निशुल्क जाँच गर्ने व्यवस्था मिलाइएको विद्यालयका प्रधानाध्यापक नविन मिश्राले बताउनुभयो । साहिब दरबारले यसअघि वीरगञ्जका विभिन्न विद्यालयमा आँखा तथा दाँत शिविर सम्पन्न गरीसकेको छ ।
प्रतिक्रिया दिनुहोस् !