• मुस्कान श्रेष्ठ
वीरगंज (पर्सा), २७ साउन । बीरगञ्जका धार्मीक तथा पर्यटकीय स्थलहरुको प्रबर्धन गर्ने उदेश्यका साथ आज वीरगञ्ज साईक्लिङ क्लबले १५ किलोमिटरको वीरगञ्ज कोरा साईक्लिङ च्यालेन्ज सम्पन्न गरेको छ । अन्तर्राष्ट्रिय युवा दिवसको अवसरमा आयोजित कार्यक्रमको उद्घाटन गर्दै वीरगञ्ज महानगरपालिकाका नगर प्रमुख राजेशमान सिंहले धार्मीक पर्यटन प्रबर्धनका लागि कार्यक्रमले ठोस सहयोग पुग्ने विश्वास व्यक्त गर्नुभयो ।
उहाँले शारिरिक तन्दुरुस्तीका साथै नगर क्षेत्रका पर्यटकीय स्थलहरुलाई चिनाउन यस्ता कार्यक्रमले सहयोग पुर्याउने बताउदै वातावरणमैत्री साइकलको प्रयोगबाट व्यक्तिगत स्वास्थ्य र वातावरण जोगाउन समेत सहयोग पुग्ने बताउनु भयो । वीरगञ्जको माइस्थानबाट सुरु भएको कोरा साईक्लिङ पावर हाउस चोक, चिनिमिल आवास क्षेत्रमा रहेको पशुपतिनाथ मन्दिर, बाइपास सडक खण्ड, प्रतिमा चोक, बसपार्क, वैष्णो देवी मन्दिर, शङ्कराचार्य द्वार, बिर्ता मन्दिर, होटेल मकालु र गीता मन्दिर हुँदै पुनः माइस्थान चोकमा आएर समापन गरिएको वीरगञ्ज साईक्लिङ क्लबका अध्यक्ष संजय अग्रवालले बताउनुभयो ।
उहाँले कोरामा १ सय भन्दा बढीको उत्साहजनक सहभागिता रहेको बताउनुभयो । वीरगञ्जका यु्वाहरुलाई नगर क्षेत्रमा रहेको पर्यटकीय स्थलहरुको विषयमा जानकार होस भन्ने उदेश्यका साथ कार्यक्रमको आयोजना गरिएको वीरगञ्ज साईक्लिङ क्लबका सचिव अनुप अग्रवालले बताउनुभयो । कुनैपनि तीर्थस्थललाई केन्द्रमा राखेर घडीको दिशामा परिक्रमा गर्नुलाई कोरा भनिन्छ । २०११ मा पहिलो पटक काठमाडौँबाट सुरु भएको कोरा पछिल्लो समय लोकप्रिय बन्दै गएको छ । कोरामा पर्साका सहायक प्रमुख जिल्ला अधिकारी भिमकान्त पौडेल, सशस्त्र प्रहरी उपरीक्षक सुमन थपलीया, हेमा अग्रवाल, राहुल साह, नुतन सरावगी लगायको समेत सहभागिता रहेको थियो ।
प्रतिक्रिया दिनुहोस् !