• मुस्कान श्रेष्ठ
वीरगंज (पर्सा), १४ साउन । नेवा देय् दबू बिरगंज महानगर समितिले महिलाहरुको पाठेघर सम्बन्धि निशुल्क स्वास्थ्य शिविरको आयोजना गरेको छ । बिरगंज स्थित नारायणी अस्पतालको सहयोगमा आयोजित निशुल्क स्वास्थ्य शिविरमा ७४ जना महिलाले चेकजाच गराएका छन् । स्वास्थ्य शिविर कार्यक्रमलाई सम्बोधन गर्दै बिरगंजकी समाजसेवीका अन्नपुर्ण मानन्धरले महिलाहरु स्वस्थ भए मात्रै परिवार र समाजको स्वास्थ्य सुधार हुनेमा जोड दिनुभयो । उहाँले नेपाली महिलाहरुमा पाठेघरको मुखको हुने क्यान्सरले बिकराल रुप लिइरहेको भन्दै समयमै महिलाहरु आफ्नो स्वास्थ्य प्रति सचेत हुनुपर्ने कुरामा समेत जोड दिनुभयो ।
स्वास्थ्य शिविरमा चेकजाँचको क्रममा महिलाहरुमा तल्लो पेट दुख्ने, सेतो पानी बग्ने लगायतको समस्या भेटिएको नारायणी अस्पतालकी स्त्री तथा प्रसुति रोग बिशेषज्ञ डा. दिप्ती यादवले जानकारी दिनुभयो । पाठेघरको मुखको क्यान्सर स्क्रिनिंग(भिआइए ) परीक्षण गराएका मध्ये १२ जनामा पाठेघर सम्बन्धी समस्या देखिएकाले थप उपचारका लागि नारायणी अस्पताल आउन सल्लाह दिएको उहाँले बताउनुभयो । शिविरमा नारायणी अस्पतालकी स्त्री तथा प्रसुति रोग बिशेषज्ञ डा. प्रिती यादव, डा. दिप्ती यादव, डा. मिता महर्जनले संयुक्तरुपमा महिलाहरुको चेकजाँच गर्नु भएको थियो ।
पाठेघर सम्बन्धि निशुल्क स्वास्थ्य शिवीर बिशेष गरी गाउँघरमा हुने गरेको हुदा सहरी क्षेत्रमा समेत यसको आवश्यकतालाई मध्य नजर गर्दै बिरगंजमा यो शिविरको आयोजना गरिएको नेवा देय दबू बिरगंज महानगर समितिका अध्यक्ष सत्यम खड्गीले जानकारी दिनुभयो । उहाँले पाठेघरमा हुने क्यान्सरको कारण महिलाहरुले ज्यान गुमाउनु परेको भन्दै यही बिकराल समस्या केही न्यूनीकरण होस भन्ने उद्देश्य लिएर शिविरको आयोजना गरेको बताउनुभयो ।
नारायणी अस्पतालकी प्रसुती गृहकी नर्सिङ्ग इन्चार्ज हेमा थापाले पाठेघरको मुखको क्यान्सर तथा स्तन क्यान्सरको बिषयमा जानकारी गराउनु भएको थियो । उहाँले गाउँघरमा महिलाहरु स्वास्थ्य अज्ञानताको कारण र सहरी क्षेत्रमा भने जानकारी भएर पनि चेकजाँचका लागि समय नभएको कारण यो रोगबाट पिडीत हुने गरेको बताउनुभयो । थापाले यसबाट जोगिन बेलाबेलामा पाठेघरको समस्या चेकजाच गर्न आग्रह गर्नुभयो ।
शिविर कार्यक्रममा नारायणी अस्पतालका मेडिकल सुपरिटेनडेन्ट डा. चितरजन शाह, बरिष्ठ स्त्री तथा प्रसुति रोग बिशेषज्ञ डा. सुरेन्द्र चौधरी लगायतको उपस्तिथी रहेको थियो । शिविरमा उपचार पश्चात निशुल्क औषधि समेत वितरण गरिएको थियो ।
प्रतिक्रिया दिनुहोस् !