वीरगंज (पर्सा), १४ साउन । वीरगंज महानगरपालिका वडा नं. ३१ को मिलन चौकदेखि लालपर्सासम्म बनिरहेको सडकमा गुणस्तरहीन काम भएको भन्दै त्यसलाई तत्काल मादण्ड अनुसार निर्माण गर्न निर्देशन दिइएको छ । पर्सा क्षेत्र नं. १ का सांसद प्रदीप यादले ठेकेदार कम्पनी एवं भौतिक पूर्वधार विकास मन्त्रालय अन्तर्गतको सडक डिभिजन कार्यालय हेटौडाका इन्जिनियरलाई मापदण्ड अनुसार गुणस्तर काम गर्न निर्देशन दिएका हुन् ।
सडक निर्माण कार्य पर्साको क्षेत्र नं. १ मा पर्ने भएको हुँदा कमसल सामाग्री प्रयोग गरि गुणस्तरहीन काम गरेर सांसद यादवलाई बद्नाम गर्न खोज्दा स्थानीयहरुले ठेकेदार कम्पनीलाई घेरेर यादवलाई जानकारी गराएका थिए । त्यस पश्चात सांसद यादवको निर्देशनमा स्वकीय सचिव निखिल वणर्वालको नेतृत्वमा सडक डिभिजन कार्यालय प्रमुख सहितको टोली तत्काल निर्माणस्थल पुगी अनुगमन गर्दा गुणस्तरहीन काम भएको पाएपछि सांसद यादले मापदण्ड अनुसार गुणस्तरीय काम गर्न ठेकेदार कम्पनीलाई निर्देशन दिएका थिए । मिलन चौकदेखि लालपर्सा सम्मको ७.५ किलोमिटर सडक स्तरोउन्नति एवं कालोपत्रे गर्न शारधा अमित जेवी कम्पनीले ठेक्का सकार गरेको छ । कम्पनीले सडक ३.५ मिटरदेखि ७ मिटर सम्मको चौडाईमा कालोपत्रे गर्न २ करोड ९८ लाखमा ठेक्का सकार गरेको छ ।
सडक कालोपत्रे गरेको केहि दिनमै पिच खुइलिएको भिडियोहरु समाजिक सञ्जालमा सार्वजनिक भएपछि सांसद यादव सडकको अनुगमन गर्न इन्जिनियर एवं निर्माण कम्पनी सहितको टोलीलाई शनिवार मिलन चौकमा बोलाएका थिए । त्यस पश्चात स्थानीयहरुले गुणस्तरहीन काम गरेको भन्दै विरोध जनाउन थालेपछि ठेकेदार कम्पनी र इन्जिनियरलाई गुणस्तरीय काम गर्न निर्देशन दिएका थिए । सडक निर्माणमा ठेकेदार कम्पनी र इन्जिनियरको मिलोमतोमा गुणस्तरहीन काम भएको स्थानीयहरुको भनाई छ ।
कालोपत्रे कमजोर हुनुमा भौतिक पूर्वधार विकास अन्तर्गतको सडक डिभिजन कार्यालयका कर्मचारी एवं ठेकेदार कम्पनी दोषी स्थानीयहरुको भनाई छ । उनीहरुले निर्माण कम्पनीले हतारमा रातीको समयमा काम गरेको कारण कालोपत्रे गर्ने काम गुणस्तरीय नभएको बताए । कालोपत्रे उप्केको ठाउँमा पुनः कालोपत्रे गर्नुपर्ने स्थानीयहरुको माग छ । ठेकेदार कम्पनी शारधा अमित जेवीका संचालक जितेन्द्र साहले पिच गर्ने वेलामा पानी परेको एवं केहि प्राविधिक त्रुटि भएको कारण केही स्थानमा पिच उप्केको स्वीकारे । उनले कालोपत्रे उप्केको जानकारी पाउने वित्तिकै पुनः निर्माणको कार्य थालनी गरिसकेको बताए ।
सडक निर्माणको क्रममा मौसमले साथ नदिएको कारण केही ठाउँमा सडक गुणस्तरीय हुन नसकेको भन्दै साहले दुई हप्ताभित्र विग्रेको सडक पुनः निर्माण गरिने विश्वास व्यक्त गरे । अनुगमनको लागि मिलन चौक पुगेका भौतिक पूर्वधार विकास कार्यालय अन्तर्गतका सडक डिभिजन कार्यालय हेटौडाका इन्जिनियर ग्रिसनन्द पोरसले कम्पनीले राम्ररी काम नगरे धरौटी फिर्ता नहुने एवं ठेक्काको रकम असुल उपर गर्न सक्ने बताए ।
उनले केही ठाउँमा कालोपत्रे खुलिएको कुरा आएको हुँदा कम्पनीलाई तत्कालै सो ठाउँमा पुनः कालोपत्रे गर्न पत्रचार गरि सकिएको बताए । कार्यालयको पत्रचारपछि कम्पनीले काम पनि शुरु गरिसकेको हुँदा स्थानीयहरुलाई नआतिन आग्रह गरे । गुनासो बढेपछि आफु स्वयम पुनः बाटो हेर्न आएको उनको भनाई छ । अन्य ठाउँहरुको पिचको गुणस्तर राम्रो पाइएको भएपनि मिलन चौकमा अलि समस्या रहेको उनले बताए । बाटो निर्माण भएको वेलामा कुनै ठाउँमा पिच नखुइएिको बताउँदै उनले कम्पनीलाई आर्थिक बर्षको अन्ततिर भुक्तानी गरिएको भएपनि बिग्रेको काम पुनः ठेकेदार कम्पनीले बनाउने प्रावधान रहेकोले ठेकेदारले विग्रेको सडक तत्काल पुनः निर्माण गर्ने बताए ।
प्रतिक्रिया दिनुहोस् !