वीरगंज (पर्सा), १३ साउन । वीरगंजमा खानेपानीको हाहाकार भएपछि ट्याङ्कर एवं ट्याङ्कीबाट टोलटोलमा पानी वितरणको कार्य तिब्र रुपमा भइरहेको छ । वीरगंज महानगरपालिकाको अधिकांश क्षेत्रमा चापाकल सुकेर पानीको अभाव हुन थालेपछि महानगरपालिकाले विभिन्न वडामा ट्याङ्करबाट पानी वितरण कार्यलाई तिब्रता दिएको हो ।
महानगरले वडाहरुमा पानी वितरणका लागि समय तालिका नै सार्वजनिक गरेको छ । महानगरले ट्याङ्करबाट पानी वितरण गर्नुका साथै विभिन्न स्थानमा अस्थायी ट्याङ्की नै राखेर पानी वितरणको व्यवस्था मिलाएको हो । नगरवासीको जनजीवन सहज बनाउन महानगरले समय नै तोकेर पानी वितरणका लागि तालिका सार्वजनिक गरेको महानगरका मेयर राजेशमान सिंहले बताए ।
विहान ५ बजेदेखि राती ८ बजेसम्म विभिन्न १९ वटा वडामा ट्याङ्करमार्फत पानी वितरण गरिरहेको र अन्य वडामा पनि समस्या देखिए पानी उपलब्ध गराइने मेयर सिंहले बताए । ट्याङ्करबाट अहिलेसम्म १९ वटा वडामा दैनिक पानी उपलब्ध गराइरहेको र ७ वटा वडाको विभिन्न स्थानमा अस्थायी ट्यांकी राखिएको छ । यसका साथै खानेपानी संस्थानको पाइपलाईन विस्तार भएका ठाउँको सार्वजनिक स्थानहरुमा खानेपानीको धारा जडान गर्ने कार्यलाई महानगरले तिब्रता दिएको मेयर सिंहको भनाई छ ।
वडा नम्वर १ देखि १७ र १९ मा खानेपानीको पाइपलाइन विस्तार भएकाले ती वडाका सार्वजनिक स्थानमा धारा जडान गर्ने कार्य भइरहेको महानगर खानेपानी शाखाका प्रमुख भोगेन्द्र चापागाइँले जानकारी दिए । पानीको सतह तल झरेपछि वीरगंज महानगरभित्रका विभिन्न वडाका हजारौँ चापाकलहरु सुकेका छन् । तत्कालै प्राकृत्तिक रूपमै जलस्तरमा सुधार आउने सम्भावना न्यून देखिएकाले महानगरले अहिले पानी ट्याङ्कीमार्फत अस्थायी रूपमा समस्या समाधानको प्रयास गरिरहेको हो ।
वीरगंज महानगरपालिका सहित विभिन्न सामाजिक संघ संस्थाहरुले पनि पानी वितरणलाई तिव्रता दिएका छन । सामाजिक उत्तरदायित्व अभियान अन्तरगत रेडियो बीरगंजले विगत दुई साता देखि पानी वितरण गर्दै आएको छ । रेडियो वीरगंजले आज वीरगंज महानगरपालिका वडा नम्बर १६ अमरचोक र रेल्वे चोकमा खानेपानी वितरण गरेको छ । खानेपानीको अभावमा परेकाहरुलाई तत्काल पानी उपलब्ध गराउने अभियानमा रेडियो वीरगंज क्रियाशिल रहदै आएको छ ।
प्रतिक्रिया दिनुहोस् !