वीरगंज (पर्सा), १३ साउन । पर्साको जिराभवानी गाउँपालिकाले ३० करोड ३१ लाख ४८ हजार रुपैयाँ बराबरको बजेट पारित गरेको छ । १२ औं गाउँ सभाबाट पारित आर्थिक बर्ष २०८०/०८१ को बजेट एक कार्यक्रमबीच गाउँपालिकाकी उपाध्यक्ष रेखा चौधरीले सार्वजनिक गरेकी छिन् । गाउँपालिका अध्यक्ष अनोज चौधरीको अध्यक्षतामा आयोजित कार्यक्रममा उपाध्यक्ष चौधरीले बजेट प्रस्तुत गर्दै आम्दनी तर्फ नेपाल सरकारबाट प्राप्त अनुदान वित्तिय समानिकरण ९ करोड ४२ लाख रुपैयाँ, सर्शत चालुतर्फ ११ करोड २४ लाख रुपैयाँ, सर्शत पुँजीगततर्फ ९० लाख रुपैयाँ, विशेष अनुदानतर्फ १ करोड रुपैयाँ र समपुरक अनुदानतर्फ ५० लाख रुपैयाँ एवं राजस्व बाँडफाडतर्फ ५ करोड ४५ लाख रुपैयाँ रहेको बताइन् ।
यसैगरी प्रदेश सरकारबाट प्राप्त अनुदान बित्तीय समानीकरण ६५ लाख ४८ हजार रुपैयाँ, विशेष अनुदान ३० लाख रुपैयाँ, समपुरक अनुदान २० लाख रुपैयाँ तथा आन्तरिक आय ५० लाख रुपैयाँ र आन्तरिक राजस्व १५ लाख रुपैयाँ रहेको बताइन् । उनले खर्चमा पुँजीगततर्फ कृषि विकास तथा पशु सेवामा ५० लाख रुपैयाँ, शिक्षा क्षेत्र विकासमा १ करोड १२ लाख रुपैयाँ, स्वास्थ्य क्षेत्र विकासमा ५० लाख रुपैयाँ, मर्मत सम्भार कोषमा ५० लाख रुपैयाँ, सम्पुरक कोषमा ५० लाख रुपैयाँ, भैपरी आउने पुँजीगत खर्च ४० लाख रुपैयाँ, गाउँपालिकाको प्रमुख सडक मर्मत ४० लाख रुपैयाँ, बृक्षारोपणमाम १० लाख रुपैयाँ, सडक बत्ती खरिदमा १० लाख रुपैयाँ, महिलाहरुको क्षमता विकास तथा जनचेतना कार्यक्रममा २० लाख रुपैयाँ, खेलकुद विकासमा १५ लाख रुपैयाँ, न्यायिक समिति व्यवस्थापनमा ५ लाख रुपैयाँ बजेट छुट्याएको वताइन् ।
यसैगरी वडास्तरीय योजनाहरुको लागि २ करोड रुपैयाँ, गत आ.व.को भुक्तानी गर्नु पर्ने वाँकी एक करोड ४८ लाख रुपैयाँ, आन्तरिक भुक्तानी गर्नुपर्ने वाँकी एक करोड २६ लाख रुपैयाँ, कृषि पोल तथा तार जडान १ करोड २५ लाख रुपैयाँ, कृषकहरुको कृषि मोटर खरिद तथा वितरण कार्यक्रमको लागि २५ लाख रुपैयाँ र विपद व्यवस्थापनको लागि १० लाख रुपैयाँ विनियोजन गरेको जानकारी दिइन । उनले चालुतर्फ चालु खर्च ५ करोड ४४ लाख ४८ हजार रुपैयाँ र नेपाल सरकारको सर्शत कार्यक्रममा १४ करोड एक लाख रुपैयाँ विनियोजन गरेको वताइन ।
गाउँपालिकाको वडा नं. ३ स्थित बरात भवनमा आयोजित कार्यक्रममा डा. बालकृष्ण चौधरी, प्रदेश सभा सदस्य शंकर चौधरी, प्रमुख प्रशासकीय अधिकृत अमित कुमार गिरी, सबै वडाका वडाध्यक्ष, गाउँ सभा सदस्य, गाउँपालिकाका कर्मचारी, सुरक्षाकर्मी लगायतको उपस्थिति रहेको थियो ।
प्रतिक्रिया दिनुहोस् !