वीरगंज (पर्सा), १३ साउन । वीरगंज महानगरपालिका वडा नं. २८ बगही निवासी जिउँदो सहिद मन्सी पटेलको अपाङ्ग भत्ता कार्ड बनाइएको छ । वीरगंज महानगरपालिकाका उप-प्रमुख इम्तियाज आलम तथा वीरगंज महानगरपालिका कार्यपालिका सदस्य कनिका कौशिकको संयुक्त पहलमा पटेलको घरमै पुगी अपाङ्ग भत्ता कार्ड बनाइएको हो ।
पटेल २०७२ सालको मधेश जनआन्दोलनमा प्रहरीको गोली लागी पुणर् रुपमा अपाङ्ग भएका थिए । त्यस पश्चात उनलाई जिउँदो सहिद घोषणा गरिएको थियो । आन्दोलनमा सहिद भएकालाई मधेसी दलका गठबन्धनले सहिद परिवारलाई ५० लाख रुपैयाँ दिने निणर्य गरेको थियो तर मधेशी दलको दुई पटक सरकार बनेतापनि घोषणा गरिएको रकम सहिद परिवारलाई दिइएको छैन ।
प्रदेशमा मधेसी पार्टीको सरकार हुँदा पनि सहिदहरुलाई उपेक्षा गरिएको छ । कुनैपनि कार्यक्रम आरम्भ हुनु भन्दा पहिले मधेसी सहिदलाई आँखा चिम्लेर श्रद्धाञ्जली अर्पण गर्नुभन्दा पनि आँखा खोलेर यस्ता सहिदहरुको आधारभूत आवश्यकता पूरा गर्ने जिम्मेवारी मधेसी दलले लिनुपर्ने हो । महानगरपालिकाका उप-प्रमुख आलमले आफू सक्दो सहयोग गर्ने प्रतिबद्धता जनाएका छन् । साथै पटेलले आवासको व्यवस्था गरिदिन सरकारसँग माग गरेका छन् ।
प्रतिक्रिया दिनुहोस् !