काठमाडौं, १० साउन । राजश्व अनुसन्धान विभागले झण्डै एक सय किलो सुन बरामद गरेपछि यसका विभिन्न कोणहरुबाट अनुसन्धान भइरहेको छ । त्रिभुवन विमानस्थलबाट जाँच पास भई बाहिरिसकेको सुन विभागले सिनामंगलबाट बरामद गरेको थियो । सुन बरामदपछि यो काण्डमा अहिलेसम्म १५ जना पक्राउ परिसकेका छन् ।
विभागले सुन तस्करको मुख्य गिरोहको केन्द्रसम्म नै पुग्न भन्दै प्रहरीको साथ खोजेपछि नेपाल प्रहरीका एसपी कृष्ण पंगेनीलाई अनुसन्धानमा खटाइएको छ । त्रिभुवन अन्तर्राष्ट्रिय विमानस्थल भन्सार कार्यालयबाट चेकजाँच गरी बाहिरिएको झण्डै एक सय किलो सुन राजश्व अनुसन्धान विभागबाट खटिएको टोलीले साउन ३ गते बरामद गरेको थियो । हङकङबाट तस्करी गरी ल्याएको सुन बरामद गरिएसँगै यो काण्डमा अहिलेसम्म १५ जना पक्राउ परिसकेका छन् ।
अहिलेसम्मकै सबै भन्दा ठूलो परिमाणमा सुन बरामद गरिएपछि मुख्य तस्करसम्म पुग्ने गरी अनुसन्धान अघि बढाइएको राजश्व अनुसन्धान विभागले जनाएको छ । विभागले अनुसन्धानका लागि प्रहरीको समेत साथ खोजेपछि मंगलबार मात्रै नेपाली प्रहरीका एसपी कृष्ण पंगेनीलाई खटाएको छ । सुन तस्करी भएको यो पहिलो पटक भने होइन । पटक पटक देशकै प्रमुख अन्तर्राष्ट्रिय विमानस्थलबाट सुन तस्करी हुँदै आएको छ ।
क्याथे प्यासेफिक एयरलाइन्सको विमानबाट १५ जुलाईमा नै भन्सार आइपुगेको सुन तीन दिनपछि विमानस्थलबाट बाहिरिएको थियो । प्रधानमन्त्री कार्यालय मातहतमा रहने विभागबाट सुन बरामद भएसँगै प्रकरणमा गृहमन्त्री नारायणकाजी श्रेष्ठकै संलग्नता रहेको भन्दै प्रमुख विपक्षी दल नेकपा एमालेका युवाहरुले काठमाडौंमा मशाल जुलुससमेत प्रदर्शन गरेका थिए । यो बेला विदेश भ्रमणमा रहेका एमाले अध्यक्ष केपी शर्मा ओलीले पनि स्वदेश फर्किए लगत्तै गृहमन्त्री श्रेष्ठमाथि नै आरोप लगाएका छन् ।
रेडि ट्रेड प्रालिका नाममा मोटरसाइकलको ब्रेकसु र दाह्री काट्ने मेसिनमा राखेर ल्याएको झण्डै एक सय किलो सुन बरामद गरिएसँगै प्रालिका सञ्चालक दीलिप भुजेल, चिनियाँ र भारतीय नागरिक, ट्याक्सी चालकसहित १५ जना पक्राउ गरी अनुसन्धान जारी राखिएको छ ।दीलिप र उनका भाञ्जाको कारोबारमा मुख्य संलग्नता भनिए पनि सुन तस्करी गर्नेमा निकै ठूलो गिरोह रहेकोले अनुसन्धान गर्ने निकाय त्यो ठाउँसम्म पुग्नै नसक्ने देखिएको छ ।
कारोबारीहरुले हङकङमा कार्यालय नै सञ्चालन गरी सुन तस्करीमा लागेको बताइएको छ । सुन प्रकरणको अनुसन्धान तीब्र भइरहँदा मंगलबार मात्रै त्रिभुवन विमानस्थल भन्सार कार्यालयका प्रमुख अरुण पोखरेललाई हटाएर सहसचिव टोकराज पाण्डेलाई भन्सार कार्यालयको जिम्मेवारी दिइएको छ । हङकङमा नै कार्यालय सञ्चालन गर्दै आएका हङकङका नेपाली र भारतका ब्यापारीहरुले अनुकुल मिलाएर नेपालको बाटो भएर सुन पठाउने गरेका छन् ।
तस्करले काठमाडौं भित्र्याउने सुन नेपाली बाटो हुँदै भारत पठाउने गरेका छन् । यसअघि गृहमन्त्रालयले गरेको साढे ३३ किलो सुन प्रकरणको अनुसन्धानका क्रममा पनि हङकङमा कार्यालय नै सञ्चालन गरी कारोबार हुने गरेको प्रहरीले खुलासा गरेको थियो ।
प्रतिक्रिया दिनुहोस् !