रौतहट, १९ असार । नेपाल-भारत सीमा नाका क्षेत्रमा कार्यरत एक प्रहरी नायब निरीक्षकले अवैध आर्जन गरेको रकम भारतीय बैंकमा अर्कैको नाममा जम्मा गर्ने गरेको खुलासा भएको छ । इलाका प्रहरी कार्यालय बन्जरहामा कार्यरत प्रहरी नायब निरीक्षक मदन प्रसाद यादवले अवैध कमाइ भारतीय बैंकमा जम्मा गर्ने गरेको खुलासा भएको हो । उनले नेपालमा आर्जन गरेको अवैध कमाइ भारतीय आफन्त वा निकटका मानिसहरु बैंक खातामा जम्मा गर्ने गरेको बुझिएको छ। यद्यपि उनले पठाउने रकम उनका आफ्नै आफन्तको बैंक खातामा भने नभएको पाइएको छ ।
उनले आफ्नो अवैध कमाइ लुकाउन रौतहटका केही स्थानीयहरुको भारतीय आफन्तहरुको बैंक खाता प्रयोग गर्ने गरेका थिए । निरीक्षक यादवले रौतहटको ईशनाथ नगरपालिका १ का ओम प्रकाश साह, उमेश प्रसाद तथा फुलबरिया ढाकाका राजाबाबु कुमारका भारतीय आफन्तहरुको खाता प्रयोग गरेका थिए । भारतको पूर्वी चम्पारण जिल्लाको फुलबरिया ढाकास्थित बस्ने ती भारतीय आफन्तहरुको बैंक खातामा अवैध रुपमा लाखौँ रुपैयाँ जम्मा भएपछि भारतीय बैंकले ती आफन्तहरुको खाता नै रोक लगाइदिएको छ । स्रोत नखुलेको अवैध रकम बैंक खातामा जम्मा हुन आएपछि सबैको खाता रोक्का गरिएको बुझिएको छ । बैंकको खाता रोक्का भएपछि खाता खुलाउन यता नेपालमा रहेका उनीहरुका आफन्त ओम प्रकाश साह र उमेश प्रसाद र राजाबाबु कुमारले आफन्तका बैंक खातामा अवैध रुपमा रकम जम्मा गर्ने नायब प्रहरी निरीक्षक यादवविरुद्ध जिल्ला प्रशासन कार्यालय रौतहट र जिल्ला प्रहरी कार्यालय रौतहटमा उजुरीसमेत दिएका छन् ।
ओम प्रकाश साह र उमेश प्रसाद र राजाबाबु कुमारले छुट्टाछुट्टै निवेदन दिई आफन्तको नाममा फुलबरिया ढाकामा रहेको एसबिआई बैंकको खातामा प्रहरी नायब निरीक्षक यादवले रकम जम्मा गरेको बताएका छन् । यसरी बैंक खातामा रकम जम्मा भएपछि बैंकले खाता नै बन्द गरिदिएको भन्दै कारबाहीका लागि प्रनानि यादवलाई पक्राउ गरी कारबाही गर्न र खाता खुलाउने मार्ग प्रशस्त गरिदिन उनीहरुले निवेदनमा उल्लेख गरेका छन् । ओमप्रकाश साहले दिएको निवेदनमा नातेदार भाइ सुकरित कुमार चौधरीको नाममा रहेको खातामा प्रनानि यादवले ३ लाख ९६ हजार, मसरुफ आलम र जफिर आलमसमेतको नाममा रहेको खातामा २ लाख ९८ हजार, जफिर आलमको खातामा ४ लाख रुपैयाँ पठाएको उल्लेख गरिएको छ ।
यसै गरी उमेशप्रसादले दिएको निवेदनमा प्रनानि यादवले भारतस्थित आफन्तको खातामा रकम जम्मा गरेको उल्लेख गरेका छन् । प्रनानि यादवले कमलेश पटेलको खातामा २ लाख र ललन प्रसादको खातामा पनि २ लाख रुपैयाँ पठाएको जम्मा गरेको निवेदनमा उल्लेख गरिएको छ । भारतीय नागरिक बरेवा फुलबरियाका राजाबाबु कुमारले दिएको निवेदनमा प्रनानि यादवले ३ लाख रुपैयाँ आफ्नो खातामा जम्मा गरेको उल्लेख गरेका छन् । लामो समयदेखि विभिन्न भन्सार तथा प्रहरी युनिटमा इन्चार्ज रहँदै आएका प्रनानि यादवले तस्करीबाट हुने कमाइलाई आफन्तको नाममा जम्मा गर्दै आएको देखिएको छ । नेपालका आफन्तको नाममा पनि प्रनानि यादवले अवैध रकम जम्मा गरेको हुन सक्ने अनुमान गरिएको छ । नेपालमा अवैध कमाइ पचाउन असजिलो हुने भएपछि भारतका विभिन्न आफन्त तथा नजिकका विश्वासपात्रका नाममा रकम जम्मा गर्ने गरेको उक्त निवेदनबाट रहस्योद्घाटन भएको हो ।
हाल निवेदकहरु सबैको बैंक खाता रोक्का गरिएको जनाइएको छ । प्रनानि यादवले आफ्नो अवैध आर्जनलाई वैध बनाउन विभिन्न व्यक्तिको नाममा रकम जम्मा गराई प्रक्रिया पुर्याएर आफ्नो घरको सदस्य तथा आफन्तको नाममा वैध रकम बनाउने गरेको पनि बुझिएको छ । जिल्ला प्रशासन कार्यालय तथा जिल्ला प्रहरी कार्यालयमा प्रनानि यादवविरुद्ध लिखित निवेदन परेपछि छानबिन प्रक्रिया अगाडि बढिसकेको बताइएको छ । घटनाको विषयमा पीडितले जानकारी गराए लगतै प्रहरी चौकी बन्जरहाका इन्चार्ज सई मदन यादवलाई आवश्यक कार्यवाहीको लागि जिल्ला प्रहरीले कार्यालय रौतहटमा झिकाएको एसपी वीर बहादुर बुढामगरले बताए । साभार : नागरिकबाट
प्रतिक्रिया दिनुहोस् !