वीरगंज (पर्सा), ३२ जेठ । वीरगंजमा यही असार ५ गते निकालिने गहवामाई रथ यात्राको तयारी तीब्र रुपमा भइरहेको छ । गहवामाई मन्दिरको ११ औँ वर्षको अवसरमा पहिलोपटक निकालिने रथ यात्राको तयारी तीब्र पारिएको हो । रथयात्राका लागि अहिले आकर्षक रथ बनाउने काम तीब्र गतिमा भईरहेको रथयात्रा समितिका सदस्य मुन्ना सर्राफले जानकारी दिए । उनले रथ निर्माणमा करिब ४ सय घनफिट काठ प्रयोग गरिएको बताए । रथ निर्माण गर्न लागि मात्र १५ लाख रुपैँया लागेको उनको भनाइ छ ।
भारत र नेपालका गरि १५ भन्दाबढी कालीगढले दिनरात रथ निर्माण गरिरहेको सर्राफको भनाई छ । सम्पूणर् काम असार ३ गते सक्नेगरि भइरहेको समितिका पदाधिकारीहरु लागिपरेको सर्राफले जानकारी दिए । रथयात्रा यहि ५ गते बिहान ६ बजे गहवामाई मन्दिरको प्राङगणबाट निकालेर दुई नम्बर रोड हुँदै रामटोल, रेशमकोठी, वीर्तामन्दिरबाट मेनरोड हुँदै अलखियामठ, आदर्शनगर, माईस्थान भएर पुन गहमावमाई मन्दिरमा पुगेर समापन गरिने बताईएको छ ।
रथयात्रमा हिन्दु धर्म र संस्कृति झल्किने झाँकीका साथै निशान र शोभायात्रा पनि प्रदर्शन गरिने गहवामाई रथ यात्रा समितिका अध्यक्ष नरेन्द्र साहले जानकारी दिए । नगरपरिक्रमापछि सोही दिन साँझ गहवामाई मन्दिर परिसरमा बृृृहत भजनकृतनको आयोजना गरिने साहले बताए । रथ यात्राको भोलिपल्ट बिहान गहवामाईलाई ५६ प्रकारको भोग चढाइने र त्यहिदिन भक्तजन तथा दर्शनार्थीहरुका लागि भण्डारा पनि सञ्चालन गरिने समितिका सदस्य मुन्ना सर्राफले जानकारी दिए । रथ निर्माणका लागि आयोजक समितिले कहि कतैबाट पनि संस्थागत रुपमा चन्दा वा आर्थिक सहयोग नलिएको उनले बताए ।
प्रतिक्रिया दिनुहोस् !