• मुस्कान श्रेष्ठ
वीरगंज (पर्सा), ३२ जेठ । कुनैबेला लामखुट्टे र फोहोर सहरको रुपमा चिनीने पर्साको वीरगञ्ज नगर अहिले सफा र चिटीक्क देखिन थालेको छ । बीरगंज महानगरपालिकामा नयाँ नेतृत्व आएसंगै लामो समयदेखि अस्तब्यस्त सडक र खुल्ला नालाको कारण दुर्गन्धित बनेको नगरमा अकल्पनिय सुधार भएको छ । महानगरपालिले बीरगंज नगर क्षेत्रको सौन्दर्यकरणलाई पहिलो प्राथमिकतामा राख्दै सरसफाई अभियानमा विशेष जोड दिएको छ ।
मधेश प्रदेशको एकमात्र महानगरपालिकाको रुपमा रहेको वीरगञ्ज यतिवेला व्यवस्थित सहरको रुपमा परिचित हुन थालेको छ । वीरगञ्जलाई हरियाली, सफा र हेर्न लायक बनाउन वीरगञ्ज महानगरपालिकाले विकासका विभिन्न कार्यहरु गर्दे आएको छ । एक वर्षंको अवधिमा सरसफाई क्षेत्रमा फड्को मारेको वीरगञ्जलाई सुन्दर बनाउने अभियान लिएर महानगर अघि बढेको छ । दैनिक तीन पटक हुने सरसफाइको कारण सुन्दर बनेको बीरगंज साझपख विभिन्न ठाँउमा जडान गरिएको झिलिमिली बत्तीले झन सुन्दरता थपेको छ ।
वीरगञ्ज महानगरपालिकाले सरसफाईमा नो कम्प्रोमाईज भन्दै सडकमा जथाभावि फोहोर फ्याक्नेलाई ५ सय देखि ५० हजारसम्मको दण्ड जरिवाना समेत गर्दै आएको छ । गत २०७९ पुष १७ गतेदेखि हालसम्म महानगरपालिकाले जथाभावि फोकोर फयाकने ४ सय ९० जनालाई कारवाही गरे बापत १२ लाख ६७ हजार ५ रुपैयाँ राजश्व संकलन गरेको छ । जरिवाना पश्चात पनि पुन फोहोर फ्याकेर अटेरी गर्नेलाई सार्वजनिक मुद्दा चलाउने महानगरपालिकाले तयारी अगाडी बढाएको छ । 
नगरको सरसफाईको लागि १० वटा टयाकटर मार्फत दैनिक ३ पटक फोहोर संकलन गर्ने गरिन्छ, त्यसको लागि ३ सय ३ जना सरसफाईकर्मी परिचालन गरिएको छ । वीरगञ्ज महानगर अन्तरगत ३२ वटै वडामा फोहोर संकलन गर्न सहज हुने भन्दै प्रत्येक वडामा ट्रयाक्टर प्रदान गरिएको वीरगञ्ज महानगरपालिकाका सरसफाई अधिकृत सर्फुद्दीन मियाँले बताएका छन् । अहिले महानगरपालिकाले विगत ३ दशकदेखि फोहोरले जाम भएको नालाहरु सरसफाई गरिरहेको छ ।
यस्तै नगरलाई हरित सहर बनाउने उदेश्यले हालसम्म २ हजार विरुवा रोपेको छ भने आगामी असारसम्म थप १५ सय विरुवा रोप्ने लक्ष्य लिएको वीरगञ्ज महानगरका वृक्षारोपण तथा सरसफाई संयोजक प्रकाश खेतानले बताएका छन् । अव्यवस्थित तरिकाले झुण्डेको नेटका तारले महानगर कुरुप देखिएको भन्दै महानगरपालिकाले हालसम्म १० हजार किलो प्रयोग बिहीन तारहरु निकालेको छ भने सो कार्य जारी रहेको छ । कुनैबेला फोहोर र दुर्गन्धका कारण वीरगञ्ज आउन नरुचाउनेहरु अहिले नगरको मुहार परिवर्तन भए संगै प्रशंसा गर्न थालेका छन् ।
वीरगञ्जलाई धार्मीक पर्यटकिय नगरीको रुपमा विकास गर्न गहवामाई मन्दिर लगायत धार्मीकस्थल सौन्दर्यकरण गरिनुका साथै घण्टाघर, शंकराचार्य गेटको रंगरोगन गरी श्रृगार्ने कार्य भइरहेकोे वीरगञ्ज महानगरपालिकाका नगर प्रमुख राजेशमान सिंह जानकारी दिए । उनले बालबालिकाहरुको मनोरञ्जनका लागि कृत्रिम जनावर तथा अन्य मुर्तिहरु राखिएको भन्दै वीरगंजलाई मैत्री शहरको रुपमा विकास गर्ने योजना अनुरुप भारतीय पर्यटकबाट अशुल गरिने वार्षीक साढे ६ करोडको सवारी व्यवस्थापन कर खारेज गरिएको बताए ।
कोभिडका कारण थलिएको बजार चलायमान बनाउन नयाँ वर्षको अवसर पारेर रात्रि बजार सुरुवात गरिएको गरी हरेक महिनाको अन्तिम शुक्रबार र शनिबार रात्रि बजारलाई अघि बढाइएको नगर प्रमुख सिंहले बताए । अहिले महानगरपालिकाले माइस्थान नजिकै रहेको मिना बजार क्षेत्रको सडकमा पेभर्स लगाएर चिटिक्क पार्ने काम गरिरहेको छ भने विर्ता माई मन्दिर क्षेत्रलाई पनि सौन्दर्यकरण गर्न मन्दिर परिसरमा पेभर्स लगाउने काम सुरु गरिएको छ ।
प्रतिक्रिया दिनुहोस् !