वीरगंज (पर्सा), १५ जेठ । १६ औं गणतन्त्र दिवसको अवसरमा वीरगंज कारागारबाट १९ जना कैदी कारागारमुक्त भएका छन् । कारागारमुक्त भएका १९ जनामध्ये ५ जना आममाफी पाएका छन् भने १४ जनाको कैद सजाय मिनहा गरिएको छ । १६ औं गणतन्त्र दिवसको अवसरमा राष्टूपति रामचन्द्र पौडेलद्वारा देशैभरि ५ सय १ जना कैदीको कैदमाफी गरिएकोमा वीरगंज कारागारबाट १९ जना कैदी कारागारमुक्त भएका हुन् ।
कारागारमुक्त हुनेहरुमा अपराधिक लाभ मुद्दाका १ जना, कर्तव्य ज्यान मुद्दाका ७ जना, चोरी मुद्दाका ३ जना, ज्यान मार्ने उद्योग मुद्दाका १ जना, बिना इजाजत वन पैदावार हानी नोक्सानी तथा ओ.प. मुद्दाका १ जना, सवारी ज्यान मुद्दाका ३ जना, हातहतियार खरखजाना मुद्दाका २ जना तथा लागुऔषध गाँजा मुद्दाका १ जना गरि १९ जना कैदी कारागारमुक्त भएका हुन् ।
कारागारमुक्त भएका कैदीहरुलाई कारागार प्रमुख (जेलर) मदन घिमिरेले अबिर टिका लगाई कारागारबाट विदाई गरेका थिए । विदाईको क्रममा जेलर घिमिरेले कैद जीवनबाट मुक्त भइसकेका कैदीहरुलाई वितेका दिनहरुलाई विर्सदै आगामी जीवनको यात्रा सुखमय होस् भन्ने शुभकामना दिएका थिए । उनले आगामी दिनमा यस्ता अपराधिक क्रियाकलाप जस्ता कार्यबाट टाढा रही इमान्दारीतापूर्वक काम गरेर आफ्नो परिवारसँग सुखमय जीवन वितोस् भन्ने शुकामना सहित यहाँबाट सकारात्मक सुधार भएका कुरालाई आफ्नो जीवनमा लागु गर्न समेत आग्रह गरे ।
विभिन्न मुद्दामा कारागार जीवन विताई रहेका कैदीहरुमध्ये सरकारको नियमावली अनुसार ५० प्रतिशत कैद सजाय भुक्तान गरिसकेको र चालचलनमा सुधार आइसकेको कैदीलाई चौकीदारको सल्लाह अनुसार कारागार प्रमुखले गरेको सिफारिसमा राष्टूपतिद्वारा कैद सजाय मिनाहा गर्ने कार्य गरिँदै आएको छ । संविधानको धारा २७६ को फौजदारी कसुर ऐन, २०७४ तथा फौजदारी कसुर नियमावली, २०७६ मा मन्त्रिपरिषद्को सिफारिसमा राष्टूपतिले कैदी बन्दीको कैद मिनाहा गर्न सक्ने व्यवस्था अनुसार राष्टूपति रामचन्द्र पौडेलको सिफारिसमा देशैभरि ५ सय १ जना कैदीको कैद सजाय मिनहा गरिएको हो ।
प्रतिक्रिया दिनुहोस् !