वीरगंज (पर्सा), १० जेठ । पर्साको छिपहरमाई गाउँपालिकामा अख्तियारले छापामारी गर्दै कागजात नियन्त्रणमा लिएको छ । गाउँपालिकाको काम कारवाही र विकास निर्माणमा गरिएको भ्रष्टाचार विरुद्ध परेका उजुरी सम्बन्धि कागजात माग गर्दापनि उपलब्ध नगराएपछि अख्तियार टोलीले गाउँपालिका कार्यालयमै पुगेर कागजात नियन्त्रणमा लिएको हो । अख्तियार दुरुपयोग अनुसन्धान आयोगको कार्यालय हेटौंडाको टोलीले मङ्गलबार गाउँपालिका कार्यालयमा छापामारी गर्दै उजुरी परेका योजना सम्बन्धि फाइल र कागजातहरु नियन्त्रणमा लिएको छ ।
गाउँपालिकाका अध्यक्ष मनोज कुमार गुप्ता, प्रमुख प्रशासकीय अधिकृत राकेश ओझा लगायतका जनप्रतिनिधि र कर्मचारीले मिलोमतोमा विभिन्न योजना, कर्मचारी नियुक्ति, सामग्री खरिद लगायतमा भ्रष्टाचार गरेको उजुरी परेपछि अख्तियारले सम्बन्धित योजनाहरुको कागजात माग गरेको थियो । तर, अध्यक्ष गुप्ताको निर्देशनमा प्रमुख प्रशासकीय अधिकृत ओझाले कागजात उपलब्ध गराउन आलटाल गर्दै आएका थिए ।
पटकपटक आग्रह गर्दापनि गाउँपालिकाले कागजात उपलब्ध नगराएपछि अख्तियार टोलीले कार्यालयमै पुगेर कागजात नियन्त्रणमा लिएको अख्तियार दुरुपयोग अनुसन्धान आयोगको कार्यालय हेटौडाका सूचना अधिकारी विष्णुप्रसाद सापकोटाले जानकारी दिए । ‘हामीले कयौँ पटक कागजातहरु माग गर्यौं तर छिपहरमाईका कर्मचारी र जनप्रतिनिधिले विभिन्न बहाना बनाउँदै फाइल दिन आनाकानी गर्दै आइरहेका थिए’, सूचना अधिकारी सापकोटाले भने, ‘अत्ती भएपछि हामी आफै गाउँपालिका पुगेका हौँ, आवश्यक कागजात र फाइलहरु नियन्त्रणमा लिएर आएका छौँ ।’
सूचना अधिकारी सापकोटाका अनुसार गाउँपालिकाका अध्यक्ष गुप्ता र प्रमुख प्रशासकीय अधिकृत ओझा विरुद्ध कम्तिमा पनि १५ वटा उजुरी परेको छ । फाइलहरु छिपहरमाई विरुद्ध परेका उजुरीका विषयमा छानविन गरिरहेका अनुसन्धान अधिकृतलाई बुझाइएको सापकोटाको जानकारी दिए । अनुसन्धानका क्रममा भ्रष्टाचार ठहर भए अख्तियारले आवश्यक कारवाहीको प्रक्रिया अगाडि बढाउने उनले बताए ।
यता, गाउँपालिका अध्यक्ष मनोजकुमार गुप्ताले छापामारी नभएको दावी गरे । परेको उजुरी सम्बन्धि कागजातहरु अध्ययनका लागि अख्तियार टोलीले कागजातहरु लगेको बताउँदै उनले भने, ‘छापामारी नै भएको होइन । ‘करारमा नियुक्त गरिएका कर्मचारीको विषयमा कसैले उजुरी दिएको रहेछ, सोही सम्बन्धि आवश्यक कागजात अध्ययनका लागि अख्तियार टोलीले लागेको मात्र हो ।’
प्रतिक्रिया दिनुहोस् !